काठमाडौं । प्रतिनिधि सभा सदस्य माधव सापकोटाले प्रधानमन्त्री पुष्पकमल दाहाल प्रचण्डले सहजै प्रधानमन्त्री पद नछाड्ने बताउनुभएको छ ।
आइतबार प्रतिनिधि सभा बैठकमा बोल्दै सापकोटाले प्रधानमन्त्रीले संसदमा विश्वासको मतको सामना गर्ने बताउनुभयो । बहादुर र साहसीले सामना गर्ने बताउँदै उहाँले सरकारले विश्वासको मतको सामना गर्ने बताउनुभयो ।
‘यो संविधानमा राजीनामा दिनुपर्छ भनेर काहीँ लेखिएको छैन, संवैधानिक अधिकारलाई प्रधानमन्त्री र सरकारमा रहेका दलले फेस गर्छौँ’, उहाँले भन्नुभयो । संवैधानिक अधिकारलाई प्रयोग गरेर प्रधानमन्त्रीले लोकतन्त्रको अभ्यास गर्न खोजको उहाँले दाबी गर्नुभयो । प्रधानमन्त्रीले कुनै नेतालाई केही प्रस्ताव गरेर षडयन्त्र नगरेको उहाँले बताउनुभयो ।
सापकोटाले प्रधानमन्त्रीले विश्वासको मत प्राप्त गर्न नसके संविधानको धारा ७६ को उपधारा ३ बमोजिम ठुलो दलको हैसियतले सरकार बन्ने बताउनुभयो । प्रचण्डको राजीनामा पछि केपी ओलीको नेतृत्वमा नभई शेरबहादुर देउवाको नेतृत्वमा सरकार बन्ने दाबी उहाँले गर्नुभयो । ‘तपाईँहरूले भने जस्तो गरी हामीले सजिलै गरी मार्ग प्रशस्त गरिदिनु पर्ने ?’, उहाँले प्रश्न गर्नुभयो ।
सापकोटाले नेपाली कांग्रेस र एमाले बिच भएको सहमति अपारदर्शी भएको बताउनुभयो । त्यसैले यो सहमतिमा गम्भीर षडयन्त्र रहेको उहाँले दाबी गर्नुभयो । ‘दुईवटा दलका बिचमा के कस्ता सहमति भए त्यो आधिकारिक रूपमा बाहिर आएको छैन’, उहाँले भन्नुभयो । उहाँले दिनभर प्रधानमन्त्रीसँग छलफल गर्ने र राति कांग्रेससँग सहमति गर्न एमालेको कार्य अनैतिक भएको बताउनुभयो । कांग्रेस र एमालेको सत्ता बाँडफाँड बाहेक नयाँ बन्ने समीकरणले देशलाई स्थिरता दिन नसक्ने उहाँले दाबी गर्नुभयो । ‘यो सिधा सिधा लोकलाई ढाँट्ने काम हो’, सापकोटाले भन्नुभयो ।
सापकोटाले भुटानी शरणार्थीको फाइल खोल्ने गृह मन्त्रीको तयारी र बेचन झाको पक्राउले नै एमाले र कांग्रेस एक ठाउँमा पुगेका बताउनुभयो । भुटानी शरणार्थी प्रकरणबाट कांग्रेस र गिरिबन्धु टीस्टेट प्रकरणबाट एमाले आत्तिएर एक ठाउँमा उभिएका उहाँको दाबी छ । संविधान परिवर्तनका लागि प्रतिनिधि सभामा नयाँ बन्न लागेको समीकरणले बहुमत पुर्याउन सक्ने भए पनि राष्ट्रिय सभामा त्यो मत उहाँहरूको नभएको उहाँले बताउनुभयो । समानुपातिक निर्वाचन प्रणाली माथि हमला गर्न खोजिएको भन्दै उहाँले गएको निर्वाचनमा संविधान परिवर्तनको लागि भोट नमागिएको सापकोटाले दाबी गर्नुभयो ।
दुई दल मिलेर जे पनि गर्न सकिन्छ भन्ने कुरा लोकतन्त्र नभएको उहाँले बताउनुभयो । सङ्ख्याको जोडलाई मात्र लोकतन्त्र नठान्न उहाँले आग्रह गर्नुभयो । नागरिक जटिलतामा परेको बेलामा सरकार परिवर्तनको खेलमा लागेको भन्दै उहाँले आलोचना गर्नुभयो । सरकारले बजेट पास गरेको दुई दिन पछि नै सरकार परिवर्तनको काममा लाग्नु गैरजिम्मेवारपूर्ण काम भएको सापकोटाको भनाइ छ ।
