काठमाडौं । प्रतिनिधि सभा सदस्य दयालबहादुर शाहीले प्रधानमन्त्री पुष्पकमल दाहालले सबैलाई हेपेको परिणाम अहिलेको राजनीतिक परिस्थिति भएको बताउनुभएको छ ।
मंगलबार प्रतिनिधि सभा बैठकको विशेष समयमा बोल्दै शाहीले प्रचण्डले सधैँ बल र छलको राजनीति गरेको बताउनुभयो । प्रचण्डले ब्वाँसो सरी सुमसुम्याएर सिद्ध्याउने नीति लिनुभएको टिप्पणी गर्नुभयो । प्रचण्डले एमाले र कम्युनिष्ट पार्टी सिद्ध्याउने खेल खेलेका देख्दा बालकोट आउँदा पनि आफूहरूलाई रिस उठ्ने गरेको शाहीले सुनाउनुभयो । एमालेलाई पुनर्जीवन दिएकै कारण केपी ओलीलाई आफूहरूले त्यो छुट दिएको शाहीको भनाइ छ । ‘उहाँले मति, गति र सरस्वतीको दममा होइन, कपट र कृतघ्नता, घमण्ड र घृणाको राजनीति गर्नुभयो’, प्रचण्ड प्रति शाहीको टिप्पणी छ ।
प्रचण्डले कांग्रेस र एमालेलाई सात पटक धोका दिनुभएको शाहीले बताउनुभयो । ‘चार पटक कांग्रेसलाई हान्नुभएको छ २०७२ यता, तीन पटक एमालेलाई गरेर उहाँले सात पटक हिर्काउनुभयो’, शाहीले भन्नुभयो ।
शाहीले विद्रोही धर्म, प्रतिपक्षको धर्म र शासकीय सुझबुझ के हो राम्रोसँग अध्ययन गर्न प्रचण्डलाई आग्रह गर्नुभयो । ‘पढेको बाबुराम भट्टराईलाई खेदाइहाल्नुभयो, डण्ठा मात्रै चल्छ उहाँको, यो तेल विभाग र जाउलो विभाग खारेज गर्नुस् तपाईँको’, उहाँले भन्नुभयो ।
अहिले कांग्रेस र एमालेको अवतार समयको माग भएको शाहीले बताउनुभयो । ‘तपाईँको ढुलमुलाएको जहाज एमालेबाट झरेका पातले र जीबी राईको फोहोरमा उम्रिएका च्याउहरूले थेग्न सक्दैनन्, झारपातले र च्याउले देश थाम्न सक्दैनन्’, शाहीले भन्नुभयो ।
