काठमाडौं । प्रतिनिधि सभा सदस्य उपेन्द्र यादवले मुलुकका ठुला दल मिलेर सरकार बनाउनु समयको माग र मुलुकको आवश्यकता भएको बताउनुभएको छ ।
आइतबार प्रतिनिधि सभा बैठकमा बोल्दै यादवले देशको राजनीतिक सङ्कटको अवस्था डिलमा पुगेकाले त्यसलाई जोगाउन दुई दलको ध्यान जानु पर्ने बताउनुभयो । अहिलेको दुई ठुला दलको सरकार अन्तिम विकल्पको रूपमा रहेको उहाँले बताउनुभयो । ‘दुई ठुला दल मिल्ने भनेको यो अन्तिम अवसर हो’, उहाँले भन्नुभयो ।
अहिलेको सत्ता समीकरण पनि अघि बढेन र बिचमा टुट्यो भने त्यस पछिको परिणाम सोच्नै नसकिने दुःखद हुने यादवले बताउनुभयो । यो देशको लागि ठुलो चुनौती रहेको उहाँले बताउनुभयो । ‘मुलुक त्यस बेला ठुलै राष्ट्रिय सङ्कट तर्फ जान सक्छ, त्यस कारण मूलक सङ्कट तर्फ नजाओस् भन्ने हाम्रो चाहना हो’, उहाँले भन्नुभयो ।
अहिलेको संविधान जनता मारेर घोषणा गरिएको संविधान भएको उहाँले आरोप लगाउनुभयो । संविधानका विभिन्न विषयमा संशोधन आवश्यक रहेको उहाँले बताउनुभयो । ‘यो संविधानको पुनर्लेखन, संशोधन, परिमार्जन आवश्यक छ’, यादवले भन्नुभयो ।
मुलुकमा राजनीतिलाई अपराधीकरण र अपराधलाई राजनीतिकरण गर्ने काम भएको उहाँले बताउनुभयो । उद्योग धन्दा बन्द हुने र वैदेशिक ऋण बढ्दै गएको अवस्था रहेको उहाँले सुनाउनुभयो ।
आजको ठुलो समस्या राजनीतिक अस्थिरता भएको उहाँले प्रष्ट पार्नुभयो । यसकै कारण देशमा अनेक खालका समस्या र विकृति देखिएका उहाँले बताउनुभयो । त्यसैले राजनीतिक स्थिरताको लागि आचरण र संस्कृतिलाई परिवर्तन गर्नु पर्नेमा उहाँले जोड दिनुभयो ।
