काठमाडौं । प्रतिनिधि सभा सदस्य डा. चन्द्रकान्त भण्डारीले वर्तमान सरकारको मुख्य काम नागरिकमा आशा जगाउने कुरामा केन्द्रित हुनु पर्ने बताउनुभएको छ ।
मंगलबार प्रतिनिधि सभाको विशेष सयमयमा बोल्दै भण्डारीलेले अहिले देशका केही हुँदैन भन्ने निराशा बढेको अवस्थामा आशा जगाउने गरी काम गर्नुपर्ने प्रमुख दायित्व भएको बताउनुभयो । ‘हाम्रो समाजमा आशा हराएको छ, विश्वास टुटेको छ, त्यति मात्र होइन केही हुँदैन, केही भएन भन्ने न्यारेटिभ छ’, उहाँले भन्नुभयो ।
भण्डारीले सरकार परिवर्तनको खेलमा मात्र लाग्दा देश बरबाद भएको बताउनुभयो । ‘हामी विश्वमा सत्ता परिवर्तनको ओलम्पिक गेमामा पहिलो छौँ, त्यति मात्र होइन क्षमता विहीन युवा निर्माणमा अन्तिमबाट दोस्रो छौँ, त्यति मात्र होइन नेपालमा जन्मने २५ प्रतिशत बच्चाहरू पुड्का र च्याखुरा जन्मन्छन्, यो उपहार हामीले विगतबाट प्राप्त गरेका छौँ, यो चुनौतीलाई यो सरकारलेले सामना गर्नुपर्ने छ’, भण्डारीले भन्नुभयो ।
उहाँले सांस्कृतिक र सामाजिक रूपमा धेरै पहिचान गुम्दै गएको बताउनुभयो । त्यसैले सरकारले पुरानो सांस्कृतिक र सामाजिक पहिचानलाई जगाउनु पर्ने भण्डारीले सुझाव दिनुभयो । ‘ यो देशको सबैभन्दा ठुलो सम्पत्ति थियो, त्यो अन्त्य भएको रहेछ, पहिलाको पहिचान हामीले मेटाउनु हुँदैन, त्यो ठुलो गल्ती हामीले गरेका रहेछौँ’, उहाँले भन्नुभयो ।
उहाँले राष्ट्रिय परिचय पत्र बनाउँदा नेपाली आभूषण खोल्न लगाउने कार्य गलत भएको बताउनुभयो । नेपालको मूल्य, मान्यता र सम्पत्ति माथि अपमान भएको र त्यसमा बहकिने काम भएको भदै भण्डारीले सरकारलाई सुधार गर्न सुझाव दिनुभयो । ‘देशको पहिचान हो, त्यसलाई मेटाउने हाम्रो अधिकार छैन’, उहाँले भन्नुभयो ।
भण्डारीले ठुला मान्छे र ठुला योजनाका कुरा गर्दा जनतासँग जोडिएका कुराबाट सरकार बाहिर गएको बताउनुभयो । मुलुक परिवर्तनको लागि शिक्षालाई पहिलो प्राथमिकतामा राख्नु पर्ने उहाँले बताउनुभयो । एसईईमा असफल बालबालिकालाई सिपसँग जोड्नु पर्ने उहाँले सुझाव दिनुभयो । यसले समाजमा आशा जगाउने उहाँको सुझाव छ ।
विदेशमा प्राविधिक विषय पढ्न जाने विद्यार्थीलाई देशमा नै पढ्ने वातावरण बनाउनु पर्ने उहाँको राय छ । देशको पैसा बाहिर पठाउने र भिक मागेर ल्याएर देश बनाउन नसकिने उहाँले प्रष्ट पार्नुभयो ।
अहिले बालबालिका र युवामा खेल र सङ्गीत प्रतिको आकर्षण बढेकोले त्यसलाई तलैबाट सञ्चालन गर्न उहाँले सुझाव दिनुभयो । यसले मात्रै देशमा समृद्धि ल्याउन सक्ने उहाँले दाबी गर्नुभयो ।
कुनै नेतृत्व दृढ भएन भने देश अगाडि बढ्न नसक्ने उहाँले बताउनुभयो । विश्वविद्यालय आज नेता विहीन अवस्थामा रहेको उहाँले टिप्पणी गर्नुभयो ।
उहाँले स्वास्थ्य क्षेत्रमा बेथिति रहेको बताउँदै त्यसमा सुधार गर्नुपर्ने बताउनुभयो । गरिब जनताले आज पनि उपचार गर्न नसक्ने स्थिति रहेको भण्डारीले बताउनुभयो । अस्पतालको औषधि बेच्ने हो भने अहिले बिक्री गरेको भन्दा ६० प्रतिशत कम मूल्यमा बिरामीले औषधि पाउने र त्यसबाट अस्पतालले पनि ४० प्रतिशत नाफा पाउने उहाँको भनाइ छ ।
कृषि उत्पादनमा उत्पादनको आधारमा अनुदान र बजारको व्यवस्था गर्नुपर्नेमा उहाँले जोड दिनुभयो । किसान घाटामा जाँदैनन् भन्ने कुराको ग्यारेण्टी गर्नुपर्ने उहाँको राय छ ।
अहिले पनि १ लाख ७५ हजार जनताको बिजुलीको लाइन काटिएको बताउँदै उहाँले छलफल ठुला मान्छेको मात्रै हुने गरेको उहाँले बताउनुभयो । ठुलाबडाको कुरा गरेर जनताको समस्या समाधान नहुने भण्डारीले स्पष्ट पार्नुभयो ।
बहुदलीय व्यवस्थाको उपहार जनताको कुरा होइन ठुला मान्छेको कुरामा केन्द्रित भएको भदै उहाँले त्यसैले सरकार जनताबाट टाढा भएको बताउनुभयो । ‘राज्य अब गरिबको बन्नु पर्यो, यो सदनमा गरिबका कुरा उठ्नु पर्यो, औषधि नपाएका, बत्ती काटिएका, पढ्न नपाएका बच्चाहरूको कुरा कसले गरिदिने यो सदनमा ?’, उहाँले भन्नुभयो ।
उहाँले अब आउने पुस्ताले ऋण र ऋणको ब्याज तिर्न नसक्ने उहाँले बताउनुभयो । सीमान्तकृत वर्गले श्रमको आधारमा तिर्ने गरी अब हाइड्रो उत्पादन गर्दा २ लाख बराबरको सेयर पाउने व्यवस्था गर्न उहाँले राय दिनुभयो । यसो गर्ने हो भने तीनवटा नीतको स्रोत उपयोग गर्दा नेपालमा गरिबी अन्त्य हुने भण्डारीले दाबी गर्नुभयो ।
भण्डारीले वैदेशिक रोजगारीमा गएका युवाहरूले पठाएको पैसा जलविद्युत उत्पादनमा लगाउन सुझाव दिनुभयो । यसो गर्ने हो भने ऋण नलिई देश बनाउन सकिने भण्डारीको सुझाव छ ।
विपत्ति खोज्दै आएको छ कि यसलाई हामीले निम्त्याइरहेको छौँ भन्ने कुरा महत्त्वपूर्ण रहेको उहाँले बताउनुभयो । कमिसनका निम्ति बाटो खन्ने काम गर्दा दुर्घटना निम्तिएको बताउँदै उहाँले त्यस्तालाई कारबाही गर्नुपर्ने सुझाव दिनुभयो । समयमा काम सम्पन्न नगर्नेलाई पनि कारबाही गर्नुपर्ने उहाँले बताउनुभयो ।
भण्डारीले नेपाल बनाउन पाइने भए पनि बिगार्ने अधिकार कसैलाई नभएको उहाँले बताउनुभयो । ठुला दल मिलेर अहिले सरकार बनेकोले यही सरकारले देश बनाउने जिम्मा लिनुपर्ने भण्डारीको भनाइ छ । ‘यो देश बनाउने अधिकार छ हामीलाई, यो बिगार्ने अधिकार छैन’, उहाँले भन्नुभयो ।
