काठमाडौं । संसदीय सहकारी छानबिन समितिका सभापति सूर्य थापाले सहकारी क्षेत्रको समग्र अवस्था हेर्दा भएका कानून कार्यान्वयनमा कमि भएको टिप्पणी गर्नुभएकाे छ ।
मंगलबार सिंहदरबारमा बसेको समितिको बैठकपश्चात उहाँले सहकारी समस्याको मुख्य कारण संयन्त्र निर्माण गर्ने गरि कानून निमार्ण नहुनुको साथै बचतकर्ताहरुले लापरबाही र लोभमा परेर आफ्नो पुँजी जोखिममा राख्नु पनि भएको बताउनुभयाे ।
उहाँले भन्नुभयाे, ‘सहकारी क्षेत्रको समग्र अवस्था हेर्दा भएका कानून कार्यान्वयनमा कमि भएको छ । कानून आवश्यकता अनुसारको संयन्त्र निमार्ण गर्ने गरि बनेका छैनन् । र बचतकर्ताहरुले पनि कुन सहकारी को सञ्चालक भन्ने कुरा नबुझि पैसा जम्मा गर्ने काम लापरबाही र लोभका कारणले गरेको जस्तो देखिन्छ ।’
उहाँले बैठकमा उपस्थित प्रतिनिधिहरुको कुरा सुन्दा गरिबी निवारणमा सहकारीको भूमिका महत्वपूर्ण रहेको भन्दै सहकारी क्षेत्रलाई अझ बलियो बनाएर अगाडि बढाउनु पर्ने बताउनुभयाे ।
उहाँले भन्नुभयाे, ‘आज आउनु भएको प्रतिनिधिहरुको कुरा सुन्दा गरिबी निवारणमा सहकारी भूमिका महत्वपूर्ण रहेको र सहकारी क्षेत्रलाई अझ बलियो बनाएर अगाडि बढाउनु पर्छ । सहकारीलाई उत्पादनमा सेवा प्रवाहमा अझ व्यवस्थित रुपमा सञ्चालन गर्नुपर्छ भन्ने कुरा आएको छ ।’
आजको बैठकमा देशभरबाट सुशासनमा चलेका सहकारीका प्रतिनिधिहरु ४० जनालाई आमन्त्रित गरेको थियो । तर त्यस मध्य ३४ जनाको उपस्थिती रहेको थियो ।
यस्तै, सबैको सुझावहरु सुन्दा सहकारीको क्षेत्रमा नकारात्मक भाष्य सिर्जना गर्ने, धारणा बनाउने र यो क्षेत्रलाई नास पार्ने गरि गलत प्रचार गर्ने काम भएको पनि उहाँको भनाई छ ।
उहाँले भन्नुभयाे, ‘सबैले आफ्नो कुरा राखेका छन् । सबैको सुझावहरु सुन्दा देशभर केही सहकारी मात्र बिग्रिएका छन् र धेरै सहकारीहरु राम्रो तरिकाले चलेका छन् । अर्बौ बचत तथा ऋण परिचालन गरेका हैसियतका सहकारीहरुको कुराहरु सुन्दा सहकारीको क्षेत्रमा नकारात्मक भाष्य सिर्जना गर्ने, धारणा बनाउने र यो क्षेत्रलाई नास पार्ने गरि गलत प्रचार भएको छ भन्ने कुराको अनुभूती हुनेगरि छलफल भएको छ ।’
