काठमाडौं । प्रतिनिधि सभा सदस्य डा.प्रकाशशरण महतले राष्ट्र बैँकले लिएको मौद्रिक नीतिले देशको अर्थतन्त्रलाई ठिक बाटोमा लैजाने बताउनुभएको छ ।
सोमबार प्रतिनिधि सभा बैठकको विशेष समयमा बोल्दै महतले आफूले अर्थ मन्त्री हुँदा अर्थतन्त्रलाई ठिक ट्याकमा ल्याउने प्रयास गरेको भए पनि त्यो त्यति सुधार भई नसकेको अवस्थामा रहेको बताउनुभयो । पछिल्लो समयमा राष्ट्र बैङ्कले जारी गरेको मौद्रिक नीतिले अर्थतन्त्रलाई चलायमान गराउने उहाँको धारणा छ ।
नेपाली कांग्रेस र एमालेको संयुक्त सरकार बनेपछि आम जनमानसमा एउटा विश्वास र भरोसा जगाएको महतले बताउनुभयो । यसले आगामी दिनमा आर्थिक गतिविधि अझ बढ्ने उहाँले विश्वास व्यक्त गर्नुभयो । यसको भनेर निष्क्रिय भएर बस्नु हुने नभई सक्रिय ढङ्गले अघि बढ्नु पर्नेमा उहाँले जोड दिनुभयो ।
सेयर मार्केटमा अहिले कतिपय कम्पनीको बढेको भाउ स्वाभाविक नभएको बताउँदै महतले त्यसको अध्ययन हुनुपर्ने बताउनुभयो । यस तर्फ नियामक निकायको ध्यान जान आवश्यक रहेको उहाँको धारणा छ । केही मानिसहरूको चलखेलको कारण यो अवस्था आएको हुनसक्ने उहाँले आशङ्का व्यक्त गर्नुभयो । त्यस्तो अवस्थामा लगानीकर्ताको लगानी डुब्ने जोखिम रहेको महतले बताउनुभयो ।
देशको बजेट सिस्टमलाई पनि अनुशासनमा ल्याउन आवश्यक रहेको उहाँले बताउनुभयो । केन्द्र सरकारले १०÷१५ लाखसम्मका योजना समेत बनाएकोले त्यसले कुनै परिणाम नदिने उहाँको धारणा छ । ‘यो बजेटमा व्यापक रूपमा सुधार हुन आवश्यक छ’, महतले भन्नुभयो ।
बेथितिका कारण बजेट विनियोजनमा धेरै ठुलो समस्या आएको उहाँले बताउनुभयो । बजेट बिनाका योजनाले पूर्णता नपाउने तर्फ उहाँले सचेत गराउनुभयो । सरकारले योजनाको प्राथमिकता निर्धारण र वित्तीय अनुशासन कायम गर्न आवश्यक रहेको उहाँले बताउनुभयो ।
