काठमाडौं । प्रतिनिधि सभामा नेपाली कांग्रेस संसदीय दलका नेता शेरबहादुर देउवाले शान्ति प्रक्रियाका बाँकी कामलाई टुङ्गोमा पुर्याउन टीआरसी विधेयक महत्त्वपूर्ण रहेको बताउनुभएको छ ।
बुधबार प्रतिनिधि सभा बैठकमा टीआरसी विधेयक माथिको छलफलमा बोल्दै देउवाले शान्ति सम्झौता पछि शान्ति प्रक्रियालाई अघि बढाउन नेपालले मौलिक शैलीमा धेरै काम गरेको देउवाले बताउनुभयो । बाँकी रहेको कामलाई पनि अन्तिम टुङ्गो दिन टीआरसी विधेयकमा राजनीतिक दल बिच साझा सहमति जुट्नुले नेपालले विश्वलाई नयाँ सन्देश दिएको देउवाले प्रष्ट पार्नुभयो । ‘यो जटिल कामलाई नेपाली राजनीतिक दलले आफैँ गर्न सक्षम छन् भन्ने कुरा प्रमाणित गर्न वर्तमान सङ्क्रमणकालीन न्याय सम्बन्धी विधेयकमा राष्ट्रिय सहमतिले प्रमाणित गरेको छ’, देउवाले भन्नुभयो ।
टीआरसी विधेयक सङ्क्रमणकालीन न्यायका मान्यता, अन्तर्राष्ट्रिय मापदण्ड र सर्वोच्च अदालतको फैसला अनुकूल रहेको उहाँले बताउनुभयो । लामो समयदेखि न्याय खोजेर बसेका नागरिकलाई यो विधेयकले न्यायको अनुभूति दिलाउने देउवाले विश्वास व्यक्त गर्नुभयो । सो विधेयकलाई अन्तर्राष्ट्रिय समुदायले समेत स्वगत गर्ने देउवाको विश्वास छ ।
शान्ति प्रक्रियाको बाँकी रहेका कामलाई सफल रूपमा सम्पन्न गर्न कानुनका साथै सक्षम आयोग र प्रभाकारी कार्य प्रणाली आवश्यक रहेको बताउनुभयो । त्यसलाई प्रभाकारी बनाउने कुरामा पनि ध्यान दिनु पर्नेमा देउवाले जोड दिनुभयो ।
मुलुकलाई अप्ठेरो पर्दा नेपाली राजनीतिक दलहरू एक ठाउँमा उभिने परम्परा नै बनेको उहाँले बताउनुभयो । शान्ति प्रक्रियाका बाँकी कामलाई पनि निष्कर्षमा पुर्याउन सबै राजनीतिक दल एक ठाउँमा उभिनु पर्नेमा उहाँले जोड दिनुभयो ।
सबै दल मिलेर अहिलेको व्यवस्था ल्याएकोले त्यसको सही कार्यान्वयन र सुदृढीकरणमा लाग्नु पनि सबैको दायित्व भएको देउवाले प्रष्ट पार्नुभयो ।
