काठमाडौं । प्रधानमन्त्री केपी शर्मा ओलीले हालसम्मको अनुभव र देशको आवश्यकताको आधारमा संविधान संशोधन हुने बताउनुभएको छ ।
बिहीबार प्रतिनिधि समा बैठकमा सांसद नारायणी शर्माले सोध्नु भएको प्रश्नको जवाफ दिँदै ओलीले सबैले मिलेर संविधान संशोधन गर्नुपर्ने बताउनुभयो । ‘संविधानमा संशोधन हामीले आठ वर्षसम्म यसको कार्यान्वयनमा गरेको अनुभव र देशको आवश्यकताका आधारमा हुने हो, त्यसमा सरकारको मात्रै होइन, सम्मानित संसद्को पनि आँट चाहिन्छ, यो विषय एउटाको आँट अर्कोले हेर्ने विषय होइन, सबै मिलेर आँट गर्ने विषय हो’, ओलीले भन्नुभयो ।
संघीयता कार्यान्वयन पश्चात् साबिकमा रहेका जिल्ला स्थित केही कार्यालयको काम स्थानीय तह र प्रदेशमा गएको बताउँदै ओलीले प्रदेशले जिल्लास्थित साबिकका कार्यालयबाटै कृषि, पशु विकास, स्वास्थ्य, सहरी पूर्वाधार, खाने पानीलगायतका क्षेत्रमा सेवा दिइरहेका जानकारी दिनुभयो । संघीय सरकार मातहत रहेर गृह प्रशासन, भूमि प्रशासन, शिक्षा विकास तथा समन्वय, पूर्वाधार विकासका क्षेत्रमा जिल्ला सदरमुकामस्थित कार्यालयबाटै सेवा दिइरहेको अवस्था रहेको उहाँले बताउनुभयो । जिल्ला सदरमुकाम क्षेत्रका स्थानीय तहले समेत स्थानीय तहको केन्द्रको रूपमा जिल्ला सदरमुकाम क्षेत्रबाटै सेवा प्रदान गरिरहेका बताउँदै उहाँले नेपाल सरकारले जिल्ला सदरमुकामसँग स्थानीय तह र प्रदेश जोड्ने गरी रणनीतिक विकास कार्यक्रमहरू सञ्चालन गरिरहेको जानकारी दिनुभयो ।
जिल्ला सदरमुकाममा हालका दिनमा प्रदेशको उपस्थितिले समेत गर्दा थप बजार क्षेत्रको रूपमा विकास भइरहेका उहाँले बताउनुभयो । विभिन्न जिल्ला सदरमुकाममा विगतमा निर्माण भएका पूर्वाधारमा सरकारको लगानी खेर जान नदिने र पूर्ण सदुपयोग गर्ने नीति सरकारले अवलम्बन गर्ने उहाँले प्रष्ट पार्नुभयो ।
सरकारले वित्त नीति र मौद्रिक नीतिमार्फत निजी क्षेत्रको मनोबल बढाउने, पुँजीगत खर्च क्षमता अभिवृद्धि गर्ने, सम्पन्न भएका आयोजनाका भुक्तानी दिनुपर्ने रकम भुक्तानी दिने, उखु, दूध उत्पादक कृषकलाई भुक्तानी गर्नुपर्ने बाँकी रकम उपलब्ध गराउन उच्च प्राथमिकता दिने कार्ययोजना बनाई काम गरिरहेको ओलीले बताउनुभयो । यसबाट देशको अर्थतन्त्र बलियो र आत्मनिर्भर गराउन मद्दत पुग्ने उहाँको विश्वास छ ।
