काठमाडौं । प्रतिनिधि सभा सदस्य एवं नेपाली कांग्रेसकी सचेतक सुशीला थिङले केही राजनीतिक दलका नेताहरूले देशमा केही पनि भएन भन्ने भाष्य समाजमा निर्माण गर्न खोजेका बताउनुभएको छ ।
मंगलबार प्रतिनिधि सभा बैठकमा बोल्दै थिङले समाजमा केही पनि भएन, म भएको भए गर्थे भन्ने खालको भाष्य निर्माण गर्न खोजिएको बताउनुभयो । तीनै मानिसहरू चुनाव जितेर मन्त्री भएका र आफ्नै कारणले मन्त्री पद गुमाउँदा समेत समाजमा भ्रमको खेती गर्न भने नछाडेको भन्दै थिङले राष्ट्रिय स्वतन्त्र पार्टीका सभापति रवि लामिछाने प्रति कटाक्ष गर्नुभयो । ‘सत्तामा नहुँदा भ्रष्टाचारको फाइल खोल खोल भन्ने, सत्तामा पुगेपछि खेल्नै लागेको छु भन्ने, सत्ताबाट हटेपछि खोल्नै लागेको थिएँ मलाई हटाइहाले भन्ने, यो के भएको हो मैले बुझ्न सकेको छैन’, थिङको कटाक्ष थियो ।
थिङले नजिकको नदेख्ने टाढाको मात्रै देख्ने रोग केही नेतालाई लागेको बताउनुभयो । ‘भुटानी शरणार्थी काण्ड देख्ने, अरू काण्ड के के देख्ने, नागरिकता, पासपोर्ट, सहकारी थलै पर्न लागेको काण्ड देख्दै नदेख्ने, यो के भएको मैले बुझ्नै सकिँन’, उहाँले भन्नुभयो ।
उहाँले समाचारको लेखनशैली समेत परिवर्तन गर्नलाई पत्रकारलाई आग्रह गर्नुभयो । देशमा नकारात्मक प्रभाव पार्ने समाचार नलेख्न सुझाव दिनुभयो । देशमा सकारात्मक सोच विकास गर्ने खालका समाचार लेख्न उहाँले पत्रकारहरूलाई आग्रह गर्नुभयो ।
