काठमाडौं । प्रतिनिधि सभा सदस्य अर्जुननरसिंह केसीले देश भ्रष्टाचार र अराजकताको दलदलमा फसेको बताउनुभएको छ ।
बुधबार प्रतिनिधि सभा बैठकको विशेष समयमा बोल्दै केसीले यसलाई नियन्त्रण गर्न भ्रष्टाचार विरुद्धको ऐनमा ल्याउन लागिएको पाँच वर्षे हद म्याद हटाउनु पर्ने बताउनुभयो । त्यो व्यवस्थाले देशलाई थप भ्रष्ट र अराजक बनाउने केसीको धारणा छ । निराशालाई आशामा बदल्न भ्रष्टाचार नियन्त्रण आवश्यक रहेको उहाँले बताउनुभयो ।
केसीले समाजको हरेक क्षेत्रमा निराशा र अराजकता बढेको भन्दै चिन्ता व्यक्त गर्नुभयो । ‘देश निरन्तर रूपबाट अराजकता, निराशा र विद्रोह तर्फ गइरहेको छ, मेरो राजनीतिक जीवनमा एकैचोटी सबै क्षेत्रमा यस्तो निराशा देखेको थिइनँ’, उहाँले भन्नुभयो ।
केसीले अहिले देशमा ठुला दुई राजनीतिक दल मिलेर सरकार बनेको बताउँदै यो सरकार असफल भयो भने देश नै असफल हुने बताउनुभयो । त्यसैले मुखले होइन व्यवहारले काम गरेर देखाउन आवश्यक रहेको केसीको धारणा छ ।
