काठमाडौं । प्रतिनिधि सभा सदस्य योगश भट्टराईले माओवादीको १० वर्षे सशस्त्र द्वन्द्व हिंसात्मक नै भएको बताउनुभएको छ ।
बुधबार प्रतिनिधि सभा बैठकको विशेष समयमा बोल्दै भट्टराईले माओवादी माओवादीको हिंसात्मक आन्दोलन नभएको भए नेपाल २०६५ सालमा नै लोडसेडिङ मुक्त भइसक्ने बताएपछि माओवादीका सांसदहरूले असंसदीय भाषा प्रयोग भएको भन्दै हो हल्ला गरेका थिए । त्यसको जवाफ दिँदै भट्टराईले माओवादीको सशस्त्र द्वन्द्व हिंसात्मक नै भएको दोहोर्याउनुभयो । उहाँले यो नेकपा एमालेको धारणा भएको स्पष्ट पार्नुभयो । ‘यो हाम्रो परिभाषा हो, तपाईँ माने मान्नुस् नमाने नमान्नुस्’, भट्टराईले भन्नुभयो ।
भट्टराईले आफूले कुनै गैरसंसदीय र अमर्यादित शब्द नबोलेको दाबी गर्नुभयो । ‘हिंसै हो नि सभामुख महोदय, हिंसै हो नि, हिंसा हो, हिंसा बाहेक केही पनि होइन’, भट्टराईले स्पष्ट शब्दमा भन्नुभयो ।
उहाँले बोल्दै गर्दा बोल्न नदिनु पनि हिंसा भएको बताउँदै संसद् भित्र पनि माओवादीले आफू माथि हिंसा गरेको बताउनुभयो ।
हिंसा भन्ने शब्द कस्तो परिवेशमा प्रयोग गरिएको हो त्यस विषयमा छानबिन गर्न सभामुखले सचिवलाई निर्देश दिनुभएको थियो । तर भट्टराईले पार्टीको धारणाको विषयमा कसैले छानबिन गरेर केही नहुने स्पष्ट पार्नुभयो । ‘ यो हाम्रो राजनीतिक प्रतिबद्धता हो, के छानबिन हुन्छ ? हामीले लिएको सिद्धान्तमा के छानबिन हुन्छ ? को हो छानबिन गर्ने ?’ उहाँले प्रश्न गर्नुभयो
माओवादीबाट द्वन्द्वको बेलमा धेरै हिंसात्मक घटना भएका उहाँले उदाहरण दिनुभयो । ‘विद्युतकाे ट्रान्समिसन लाइन पड्काउन, मान्छे मार्नु, गोली ठोक्नु, पुलिस चौकीमा हान्नु, आर्मीलाई हान्नु, सर्वसाधारण मान्छेलाई हान्नु, साधारण मान्छेलाई हिँड्दै गर्दा आतङ्कित गराउनु, चन्दा उठाउनु, लुटपाट गर्नु, सबै हिंसा हो’, उहाँले प्रष्ट शब्दमा भन्नुभयो ।
भट्टराईको अभिव्यक्ति को विरोधमा माओवादीका सांसदहरूले होहल्ला गरेर आपत्ति जनाएका थिए । उनीहरूले केही बेर संसद् बैठक समेत अवरुद्ध गराए ।
