काठमाडौं । प्रतिनिधि सभा सदस्य जुलीकुमारी महतोले देश भित्र गरिएको निराशाको खेतीले देशलाई काहीँ पनि नपुर्याउने बताउनुभएको छ ।
बुधबार प्रतिनिधि सभा बैठकको विशेष समयमा बोल्दै महतोले अहिलेको सरकालाई असफल हुने कुनै छुट नभएको पनि बताउनुभयो । आम जनतामा देखिएको निराशा चिर्न सरकारले भ्रष्टाचारको विरुद्ध गम्भीर कदम चाल्नु पर्नेमा उहाँले जोड दिनुभयो ।
महतोले विद्युतको बक्यौता उठाउने बारेमा बहस चलिरहँदा अरबौँ रकम मिनाहा गरेको विषयमा पनि छलफल हुनुपर्ने बताउनुभयो । ‘तत्कालीन जिम्मेवार पदाधिकारीले जस जसलाई छुट दिन मन लाग्यो त्यसलाई छुट दिने र अरूको लाइन काट्ने जुन काम भयो त्यो न्यायसङ्गत छैन, त्यो बेला प्रयोग भएको विद्युत् महसुल उठाउने हो भने सबैसँग एक एक पैसा हिसाब गरेर उठाउनु पर्यो, हिजोका दिनमा दिएका छुट के आधारमा दिइएको हो त्यसको निष्पक्ष अनुसन्धान गरी त्यो अर्बौँ रकम उठाई राज्यको राजश्वमा राख्नु पर्यो, आफूलाई मन लाग्दा छानिछानी छुट दिने र छानिछानी असुल गर्ने भन्ने जुन विचार छ, त्यो गलत छ’, उहाँले भन्नुभयो ।
महतोले चुरो दोहनका विषयमा पनि गम्भीर हुन सरकारको ध्यानाकर्षण गराउनुभयो । चुरे क्षेत्र मरुभूमिमा परिणत हुँदै गएको उहाँले बताउनुभयो । चुरे क्षेत्रको जीवन कष्टकर बन्दै गएको उहाँको भनाइ छ ।
महतोले सीमा समस्या देखाउँदै महत्त्वपूर्ण पुल र सडक अलपत्र परेका बताउँदै त्यस विषयमा छिमेकीसँग छलफल गरी समस्या समाधान गर्नुपर्नेमा उहाँले जोड दिनुभयो । यी समस्या सममा नै समाधान गर्नुपर्ने उहाँको धारणा छ ।
