काठमाडौं । नेपाली कांग्रेसका महामन्त्री तथा सांसद् गगन थापाले नेकपा माओवादी केन्द्रका अध्यक्ष पुष्पकमल दाहाल प्रचण्डलाई उत्तेजनाको राजनीति नगर्न सुझाव दिनुभएकाे छ ।
बिहीबार बसेकाे प्रतिनिधि सभा बैठककाे विशेष समयमा बाेल्दै सांसद् थापाले उत्तेजनाकाे राजनीतिले कहीँ नपुगिने बताउनुभयाे । एउटा जिम्मेवार दलकाे जिम्मेवार नेता बरालिनु उचित नहुने उहाँले बताउनुभयाे ।
एउटा जिम्मेवार दलकाे जिम्मेवार नेताले भाेलि कुनै पनि बेला देशकाे जिम्मेवारी लिनुपर्ने बेला आफ्नाे अभिव्यक्ति आफैलाई भारी पर्न सक्ने पनि सांसद् थापाले प्रचण्डलाई सुझाउनुभयाे ।
सरकारले प्रतिपक्षकाे सम्मान गर्नुपर्ने र प्रतिपक्षले पनि आफ्नाे जिम्मेवारी बुझ्नुपर्ने उहाँले बताउनुभयाे । एकछिनको लाभको उत्तेजनाले आफैंलाई जलाउन सक्ने भन्दै सांसद् थापाले प्रचण्डलाई सचेत गराउनुभयाे । 'प्रतिपक्षले आफ्नो जिम्मेवारी बुझ्नुपर्छ, एकछिनको लाभका लागि, आफ्नो दलमा अप्ठ्यारो परेको छ त्यसैले दलका साथीहरुलाई जुरुक्क उचाल्छु भनेर क्षणिक लाभ पूरा गर्न र अन्तरविरोधमा खेल्नका लागि यति धेरै पनि बरालिनु पनि हुन्न कि आफूले लगाएकाे आगाेले आफैलाई पाेल्न सक्छ, जलाउन सक्छ, बाल्न सजिलाे छ, निभाउन गाह्राे छ'- उहाँले भन्नुभयाे ।
उत्तेजनाकाे राजनीति सजिलाे हुने तर चेतनाकाे राजनीति एकदमै गाह्राे हुने पनि सांसद् थापाले बताउनुभयाे । आवेग ओकल्न सजिलाे हुने तर विवेकपूर्ण ढंगले सम्हाल्न गाह्राे हुनेतर्फ पनि उहाँले प्रचण्डलाई सचेत गराउनुभयाे ।
मंगलबार बसेकाे प्रतिनिधि सभा बैठकमा प्रचण्डले नेपालमा पनि बंगलादेश र श्रीलंकामा जस्तै विद्रोह हुन सक्ने अभिव्यक्ति दिनुभएकाे थियाे । त्यसकाे जवाफमा सांसद् थापाले धेरै नबरालिन र उत्तेजनाकाे राजनीति नगर्न सुझाव दिनुभएकाे हाे ।
भ्रष्टाचार मुद्दामा हदम्याद मान्य नहुने भन्दै उहाँले नीतिगत निर्णयका आधारमा भ्रष्टाचारीलाई जोगाउने काम कुनै हालतमा स्वीकार्य नहुने पनि बताउनुभयाे ।
सांसद् थापाले सहकारी ठगी काण्मा आफूहरुकै कारण छानबिन समिति गठन भएको र त्याे समितिलाई प्रमाण पनि दिएको जानकारी गराउनुभयाे । रवि लामिछानेतर्फ लक्षित गर्दै उहाँले प्रमाण दिएकै कारण ९ मिनेटमा स्पष्ट पार्ने दावी गरेका लामिछानले छानबिन समितिमा ९ घण्टासम्म बयान दिनुपरेको बताउनुभयाे ।
छानबिन समितिप्रति पूर्ण विश्वास रहेको भन्दै सांसद् थापाले तथ्य र प्रमाणको आधारमा फैसला आउने दिन कुरेर बसेको बताउनुभयाे ।
