काठमाडाैं । नेकपा एमालेका सांसद् पदम गिरीले माओवादी केन्द्रका अध्यक्ष पुष्पकमल दाहाल प्रचण्डले तल्लाे स्तरमा झरेर सरकारकाे आलाेचना गरेकाे भन्दै आपत्ति जनाउनुभएकाे छ ।
बिहीबार बसेकाे प्रतिनिधि सभा बैठककाे विशेष समयमा बाेल्दै सांसद् गिरीले पूर्व प्रधानमन्त्री समेत रहेको व्यक्तिले सत्ताबाट बाहिरिने बित्तिकै तल्लो स्तरमा झरेर सरकारविरुद्ध लाग्नु गलत रहेकाे बताउनुभयाे । आफू मात्रै सुशासनकाे पक्षमा रहेकाे र अरु सबै विचाैलिया हुन भन्ने ढंगले प्रचण्ड प्रस्तुत हुनु न्यायसंगत नभएकाे उहाँले बताउनुभयाे ।
प्रचण्ड नेतृत्वकाे सरकारले सुन तस्करी काण्डमा इतिहास रचेकाे सांसद् गिरीले बताउनुभयाे । सुन तस्करी काण्डकाे सही र पारदर्शी ढंगले छानबिन भएकाे माओवादी हेडक्वार्टर रित्तै हुने समेत उहाँले बताउनुभयाे । सुन काण्डमा मुछिएका आफू निकट सबैलाई उन्मुक्ति दिने मानिसले सुशासनकाे पक्षधर हूँ भन्न नसुहाउने सांसद् गिरीले बताउनुभयाे । 'प्रचण्ड प्रधानमन्त्री हुँदा सुन तस्करीमा इतिहास रच्ने काम भयो, सायद यसको सही ढंगले, पारदर्शी ढंगले छानबिन भएको भए तपाइँको पार्टीको हेडक्वार्टरका सबै मान्छे जेलको छिँडीमा हुन्थ्यो होला,छानबिन गर्ने स्थिति बन्यो ? सबैलाई उन्मुक्ति दिने काम भयाे कि भएन ? अनि म सुशासनकाे पक्षमा छु भन्नु न्यायसंगत हुन्छ ?'- उहाँले प्रश्न गर्नुभयाे ।
विगतमा सुनिल शर्मा लगायतलाई प्रतिशाेध साँधेर पक्राउ गर्ने काम प्रचण्डले गरेकाे सांसद् गिरीले बताउनुभयाे ।
संविधान संशाेधनकाे मुद्दा नयाँ सरकारले अघि सारेकाे बेला प्रचण्डले त्यसविरुद्ध अर्नगल प्रचार गरेर निराशा फैलाउने काम गरेकाे भन्दै उहाँले आपत्ति जनाउनुभयाे । सांसद् गिरीले भन्नुभयाे - 'नयाँ सरकारले संविधान संशाेधन गर्ने प्रक्रियामा जाँदाखेरी, अब समानुपातिक समावेशीकाे व्यवस्था हटाउँदैछ, जनताकाे अधिकार खाेस्ने मनसायसाथ संविधान संशाेधन हुँदैछ भनेर उहाँले जनतामा निराशाकाे डढेलाे फैलाउने काेशिस गर्नुभएकाे छ, जनता निराश भएकाे बेलामा उनीहरुकाे बीचमा गएर अर्नगल प्रचार गर्ने,आक्राेशकाे अगुल्टाे लिएर जनतामा जाने र मुलुकमा द्वन्द्वकाे स्थिति सृजना गराउने, राजनीतिक उपलब्धिमाथि धावा बाेल्ने खालका व्यवहार जिम्मेवार नेताबाट आउनुहुन्न ।'
सत्तामा हुँदा र प्रतिपक्षमा बस्दा के गरे भन्ने कुरा स्मरण गर्न उहाँले प्रचण्डलाई आग्रह गर्नुभयाे । सत्तामा बस्दा एउटा कुरा गर्ने, सहकार्य गर्दा एमाले र कांग्रेस राम्राे हुने, सत्ताबाट बाहिरिएपछि एकैछिनमा अनेक आराेप लगाउने संस्कृति विकास हुनु चिन्ताजनक रहेकाे उहाँले बताउनुभयाे । यस्ताे प्रवृत्ति त्याग्न सांसद् गिरीले प्रचण्डलाई आग्रह गर्नुभयाे ।
विद्युतकाे बक्याैताका विषयमा प्रधानमन्त्री केपी शर्मा ओलीमाथि गलत आराेप लगाउने काम प्रचण्डले गरेकाे उहाँले बताउनुभयाे । ८ वर्ष उर्जा मन्त्रालयकाे नेतृत्व गर्दा किन बक्याैता उठाउन चाहनुभएन ? बक्याैता उठाउन लाग्नुभएन ? भन्दै सांसद् गिरीले प्रचण्डलाई प्रश्न गर्नुभयाे ।
संसद्काे छलफललाई सघन बनाउन र जनताका मुद्दामा केन्द्रित गर्न उहाँले सबैमा आग्रह गर्नुभयाे ।
