काठमाडाैं । राष्ट्रिय प्रजातन्त्र पार्टी (राप्रपा) की सांसद् रोशन कार्कीले गण्डकी प्रदेशका सांसद् राजिव गुरूङ (दीपक मनाङे) ले दिएको अभिव्यक्तिप्रति आपत्ति जनाउनुभएकाे छ ।
मंगलबार बसेकाे प्रतिनिधि सभा बैठककाे आकस्मिक समयमा बाेल्दै सांसद् कार्कीले गण्डकीमा मन्त्री पद नै लिलामीमा चढ्याएर मन्त्रिपरिषद्काे अपमान गर्ने काम भएकाे बताउनुभयाे ।
मनाङेले आफू वन मन्त्री नहुने र त्यहाँ तितेपानी मात्रै हुने बताएकाे भन्दै उहाँले याे विषय के हाे भन्दै प्रश्न गर्नुभयाे । 'गण्डकीमा त मन्त्रीकाे पद नै लिलामीमा चढ्याे, के हाे याे ? त्यसकारण राप्रपाले प्रदेश खारेज गराैं सेताे हात्ती नपालाैं भनेकाे छ, यस्ताे खालकाे गाइजात्रा हेर्नु नपराेस्, मन्त्रीज्यूले वन मन्त्रालय दिँदा त्यहाँ त तितेपाती र वनमारा मात्र हुन्छ भन्नुभएछ, के वन मन्त्रालयमा तितेपाती र वनमारा मात्र हुन्छ र ? यसले त मन्त्रिपरिषद्कै अपमान गर्या,'- सांसद् कार्कीले भन्नुभयाे ।
गण्डकीमा साेममार मन्त्रिपरिषद् पुनर्गठन गर्दा गुरूङलाई भौतिक मन्त्रालयबाट वन मन्त्रालयको जिम्मेवारी दिइएको थियो । उहाँले यसमा असन्तुष्टि जनाउँदै सोमबार पदबाट राजीनामा दिनुभएकाे थियाे । पछि मन्त्री पद बेचेकाे भनेर मनाङेकाे अडियाे सार्वजनिक भएकाे थियाे ।
