काठमाडाैं । नेपाली कांग्रेसका सांसद् डिगबहादुर लिम्बूले सुकुम्बासीलाई जग्गाधनी पूर्जा वितरण तीब्र बनाउन सरकारकाे ध्यानाकर्षण गराउनुभएकाे छ ।
मंगलबार बसेकाे प्रतिनिधि सभा बैठककाे शून्य समयमा बाेल्दै सांसद् लिम्बूले नेकपा एमाले र नेपाली कांग्रेसकाे सरकार बनेपछि सुकुम्बासीहरुले जग्गाधनी पूर्जा पाउँछाैं भनेर आशा गरेपनि त्यसकाे प्रक्रिया नै सुरु हुन नसकेकाे बताउनुभयाे ।
सुकुम्बासीहरुले जग्गाधनी पूर्जा पाउने प्रकिया तत्काल थाल्न उहाँले सरकारकाे ध्यानाकर्षण गराउनुभयाे । 'नेकपा एमाले र नेपाली कांग्रेसकाे सरकार बनेपछि देशभर खुशी छाएकाे थियाे, सुकुम्बासीहरुले अब जग्गाधनी पूर्जा प्राप्त गर्छाैं भनेर आशा गरेका थिए, त्यसकाे प्रक्रिया अघि बढिराखेकाे छैन, त्यसकारण चाँडाे भन्दा चाँडाे यसकाे प्रक्रिया सुरु गरियाेस्'- सांसद् लिम्बूले भन्नुभयाे ।
उहाँले त्रिभुवन अन्तर्राष्ट्रिय विमानस्थल भन्सारमा वैदेशिक रोजगारीबाट फर्किदा ल्याउन पाउने मात्राको सुन नै नियन्त्रणमा राखेर ४२ हजार मागिएको भन्दै आपत्ति जनाउनुभयाे । 'वैदेशिक रोजगारीमा गएका मान्छेहरू फर्केर आउँदा ५० ग्राम सुन ल्याउन दिने भन्ने व्यवस्था गरिएको छ, त्यसमा महिलालाई ५० ग्राम र पुरुषलाई २५ ग्राम भनेर लेखिएको रहेका, धादिङका रामकृष्ण विकको मलेसियाबाट आउँदा ल्याएकाे २० ग्रामको औँठी खोसेर राखियो र ४२ हजार नतिरी त्यो २० ग्राम सुन दिएको अवस्था छैन, यसमा सरकारकाे ध्यान जाओस्'- सांसद् लिम्बूले भन्नुभयाे ।
