काठमाडाैं । राष्ट्रिय स्वतन्त्र पार्टी (रास्वपा) का सांसद् तथा पूर्व खेलकुदमन्त्री विराजभक्त श्रेष्ठले संगिना वैद्यकाे राजीनामाकाे विषयलाई लिएर सरकारकाे आलाेचना गर्नुभएकाे छ ।
मंगलबार बसेकाे प्रतिनिधि सभा बैठकमा बाेल्दै सांसद् श्रेष्ठले वरीयता मिचेर राखेप तालिम तथा प्रशिक्षण विभागको निर्देशक नियुक्ति गरिएकाे भन्दै आपत्ति जनाउनुभयाे । राखेपमा मन्त्रीको ठाडो हस्तक्षेपमा पार्टीको क्याडरलाई नियुक्त गरिएको भन्दै उहाँले खेलाडीको सम्मानमाथि खेलबाड नगर्न आग्रह गर्नुभयाे ।
खेलकुदमा फाेहाेरी राजनीति नगर्न सरकारलाई आग्रह गर्दै सांसद् श्रेष्ठले संगिना जस्ता खेलाडीले अब खेल खेल्दा राष्ट्रको झण्डा नभई पार्टीको झण्डा बोक्नुपर्ने हो भन्ने प्रश्न गर्नुभयाे । 'सन् २००४ को ग्रिस ओलम्पिकमा छनोट चरण पार गर्दै ओलम्पिक खेल्ने पहिलो नेपाली खेलाडी हुन् संगिना वैद्य, तर राष्ट्रिय खेलकुल परिषद्को निर्देशक पदको बढुवामा असन्तुष्टि जनाइ राजीनामा दिनपर्नु गम्भीर र लज्जास्पद विषय हो, राज्यले पहिलो पटक महिला निर्देशक पाउँदै थियो, तर मन्त्रीको ठाडो हस्तक्षेपले पार्टीका क्याडरलाई नियुक्त गर्नु कानुनको उल्लंघन र अपमान हो, संगिनाजस्ता खेलाडीले अब खेल खेल्दा राष्ट्रको झण्डा नभई पार्टीको झण्डा बोक्नुपर्ने हो सभामुख महोदय ? यस्ताे फाेहाेरी राजनीति खेलकुदमा बन्द गर्नैपर्छ, खेलाडीकाे सम्मानमाथि खेलवाड गर्न पाइँदैन'- उहाँले भन्नुभयाे ।
खेलाडीमाथिकाे अपमान देशले सहन नसक्ने भन्दै सांसद् श्रेष्ठले यस विषयमा सरकारले तत्काल जवाफ दिनुपर्ने बताउनुभयाे ।
राखेपमा सोभितराज प्रसाईं राखेप तालिम तथा प्रशिक्षण विभाग निर्देशक नियुक्त भएपछि संगिना वैद्यले उपनिर्देशक पदबाट राजीनामा दिनुभएकाे थियाे ।
