काठमाडौं । नेपाली कांग्रेसका उपसभापति तथा सांसद् धनराज गुरुङले सहकारी ठगी काण्डमा आफू संलग्न नभएकाे स्पष्ट पार्नुभएकाे छ ।
मंगलबार बसेकाे प्रतिनिधि सभा बैठककाे विशेष समयमा बाेल्दै सांसद् गुरुङले सहकारी ठगी काण्डकाे छानबिन निष्पक्ष छानबिन हुनुपर्छ भनेर जाेडदार रुपमा उठाइरहेका बेला केही सञ्चारमाध्यममा आफ्नाे नाम जाेडेर आएका समाचारप्रति ध्यानाकर्षण गराउनुभयाे ।
०७६ सालमै सम्बन्धविच्छेद भएकी पत्नीले गरेको दोषमा आफू भागिदार नहुने भन्दै उहाँले भूतपूर्व श्रीमतीलाई कानुनी, नैतिक र व्यवहारिक रुपमा जाेड्न नमिल्ने बताउनुभयाे । बिहे गर्नु र सम्बन्ध विच्छेद गर्नु अपराध हाे हाे भन्ने समेत प्रश्न गुरुङले गर्नुभयाे ।
गुरुकी पूर्वपत्नी ज्योति गुरुङ प्रबन्ध निर्देशक रहेको मितेरी सहकारी संस्थामा रकम हिनामिनाबारे नेपाल प्रहरीको केन्द्रीय अनुसन्धान ब्यूराे (सीआईबी) मा उजुरी परेको छ ।
सोमबार बसेकाे प्रतिनिधि सभा बैठकमा राष्ट्रिय स्वतन्त्र पार्टीका सांसद् गणेश पराजुलीले गुरुङकी श्रीमती ज्योति गुरुङ मितेरी सहकारीको ठगी प्रकरणमा दोषी रहेको भन्दै कांग्रेस नेता धनराज गुरुङमाथि पनि छानबिन गर्न माग गर्नुभएकाे थियाे ।
नक्कली कुरा गर्नेहरुले साच्चिक्कै रुपमा भएकाे सम्बन्ध विच्छेदलाई नक्कली देखेकाे भन्दै सांसद् गुरुङले त्यसलाई प्रमाणित गर्न चुनाैती दिनुभयाे । 'जसले नक्कली कुरा गर्छ, त्यसले अरुलाई नक्कली देख्नु स्वभाविकै हो'- उहाँले भन्नुभयाे ।
ज्योति गुरुङसँग सम्बन्ध राम्रो नभएपछि सम्बन्धबिच्छेद गरेको र १० वर्षको बच्चा आफैंले हुर्काएको भन्दै सांसद् गुरुङले सम्बन्ध विच्छेदपछि पूर्व पत्नीकाे बारेमा कुनै जानकारी नभएकाे बताउनुभयाे । उहाँले यस विषयमा संसदीय छानबिन गर्नुपर्ने भएपनि आफू तयार रहेकाे बताउनुभयाे । रास्वपाका सभापति रवि लामिछानेप्रति लक्षित गर्दै गुरुङले भन्नुभयाे - 'प्रमाण लुकाउने सक्ने गृहमन्त्री जस्ताे पदमा म छैन, म निष्ठा र नैतिकताकाे राजनीतिमा विश्वास गर्छु, मेराे विरुद्ध लागेकाे आराेपकाे सत्यतथ्य छानबिन गरिदिन गृहमन्त्री लगायत सम्बद्ध निकायलाई आग्रह गर्दछु ।'
विगतमा पनि आफूमाथि आराेप लागेकाे र अदालतबाट निर्दाेष सावित भएकाे पनि सांसद् गुरुङले स्मरण गराउनुभयाे । सहकारी ठगीसम्बन्धी छानबिन समितिको प्रतिवेदन आउनै लाग्दा विषयलाई अन्तै मोड्न आफूलाई विवादमा तानिएको दाबी समेत उहाँले बताउनुभयाे । 'सहकारी ठगीसम्बन्धी प्रतिवेदन आउनै लागेकाे अन्तिम समयमा विषयवस्तुलाई अन्तै माेड्न रचिएकाे याे घटनाकाे छिटाे भन्दा छिटाे छानबिन गर्न माग गर्दछु'- सांसद् गुरुङले भन्नुभयाे ।
मितेरी सहकारीको रकम अपचलनमा आफूमाथि छानबिन गर्न माग गर्दै सांसद् गुरुङले कुनै पनि व्यक्तिलाई आरोपबाट उन्मुक्ति दिनुहुन्न भन्ने मान्यतामा आफू अडिग रहेकाे बताउनुभयाे । आफू खुला किताबजस्तो रहेको दाबी गर्दै उहाँले जुनसुकै कोणबाट छानबिन गर्न सकिने बताउनुभयाे ।
