काठमाडौं । राष्ट्रिय स्वतन्त्र पार्टी (रास्वपा) का सांसद् मनिष झाले उपसभामुखको पत्रलाई राजनीतिक दलहरूले वार्गेनिङ प्वाइन्ट बनाएको भन्दै आपत्ति जनाउनुभएकाे छ ।
बुधबारको बसेकाे प्रतिनिधि सभा बैठकको आकस्मिक समयमा बोल्दै सांसद् झाले म बाट गल्ती भयाे भनेर उपसभामुखले विज्ञप्ति निकालिसकेकाे अवस्थामा अहिले राजनीतिक रुपमा चर्चामा ल्याइएकाे बताउनुभयाे । 'पूर्ण ज्ञान नभएर हस्ताक्षर गर्नुभयाे, मबाट गल्ती भयाे भनेर उहाँले विज्ञप्ति पनि निकाल्नुभयाे, १९ महिनापछि त्याे राजनीतिक रुपमा चर्चाकाे विषय हुँदैछ, वार्गेनिङको प्वाइन्टकाे रुपमा त्याे लेटर प्रयाेग गरिँदैछ'- उहाँले भन्नुभयाे ।
नेपाली कांग्रेसले उपसभामुखकाे शिर झुक्यो भनेकाेप्रति आपत्ति जनाउँदै सांसद् झाले प्रश्न गर्नुभयाे - 'नेपाली कांग्रेसले शिर झुकाउने काम भयाे भनेछ, नेपालको शिर त्यसबेला किन झुकेन जुनबेला जिवित नेपालीलाई विदेशी (भुटानी) शरणार्थी बनाएर पढाइयाे ? नेपालकाे शिर त्याे बेला किन झुकेन त्याे मन्त्रीले तिर्नुपर्ने ट्याक्स तिर्न आनाकानी गरिरहेकाे छ ?'
