काठमाडौं । प्रधानमन्त्री केपी शर्मा ओलीले बाढी पहिरो लगायतका घटनाका घाइतेको उपचारको जिम्मा सरकाले लिने बताउनुभएको छ ।
सोमबार प्रतिनिधि सभा बैठकमा बोल्दै ओलीले पाँचथरमा बम विष्फोटमा परी निधन भएका दुई जना बालबालिकाका आफन्तलाई सरकारले ५÷५ लाख रुपैँया उपलब्ध गराउने निर्णय गरेको पनि बताउनुभयो । माओवादी प्रति व्यङ्ग्य गर्दै ओलीले उहाँहरूको निधन मात्रै भन्नु पर्ने कि बम विष्फोटबाट निधन भएको हो भन्ने विषयमा आफूलाई अन्यौलता रहेको बताउनुभयो । ‘बम विष्फोटबाट भन्न हुने हो कि नहुने हो, यहाँ त अन्योल अन्योल भइरहेको छ’, ओलीले भन्नुभयो ।
माओवादीको सशस्त्र द्वन्द्व हिंसात्मक भएको टिप्पणी एमालेका सांसद योगेश भट्टराईले गरेकै कारण माओवादीले संसद् बैठक अवरुद्ध गरेको थियो । आज बैठक अवरुद्ध गर्ने निर्णयबाट माओवादी पछि हटेपछि प्रतिनिधि सभा बैठकमा बोल्दै प्रधानमन्त्रीले यस्तो टिप्पणी गर्नुभएको हो ।
उहाँले सो विष्फोटनमा घाइते भएका बालबालिकाको उपचारको जिम्मा पनि सरकारले लिने जानकारी दिनुभयो । आज ती विषयमा आफूले धेरै नबोल्ने ओलीले बताउनुभयो ।
आफू संयुक्त राष्ट्र संघको महासभामा भाग लिन असोज ४ गते त्यस तर्फ जान लागेकोले त्यस विषयमा मात्र बोल्ने ओलीले जानकारी गराउनुभयो । नेपालका आफ्ना नीति, दृष्टिकोण, अडान, समस्या र उपलब्धि बैठकमा आफूले स्पष्ट रूपमा राख्ने ओलीले संसद्लाई जानकारी दिनुभयो । नेपालको तर्फबाट आफ्नो स्पष्ट दृष्टिकोण राख्ने ओलीले बताउनुभयो ।
