काठमाडौं । प्रधानमन्त्री केपी शर्मा ओलीले संयुक्त राष्ट्रसंघको महासभामा नेपालका नीति, दृष्टिकोण, अडान, समस्या र उपलब्धि स्पष्ट रूपमा राख्ने बताउनुभएको छ ।
सोमबार प्रतिनिधि सभा बैठकमा बोल्दै ओलीले असोज ४ गते आफू बैठकमा भाग लिन संयुक्त राष्ट्रसंघको हेड क्वाटरमा जान लागेको जानकारी दिनुभयो । आज दुनियाँले भोगिरहेका र नेपालले भोगेको विषय आफूले बैठकमा राख्ने ओलीले बताउनुभयो । ‘हाम्रो संसद्को गरिमालाई कमजोर बनाउने खालका भाषा, शैली, उत्तेजना वा व्यवहार, त्यस्ता विषयलाई त्यहाँ लगेर छरिने छैन, राष्ट्रका विषय, राष्ट्रका समस्या, राष्ट्रका अभिभारामा केन्द्रित भएर छलफल गरिने छ’, ओलीले भन्नुभयो ।
नेपालको मात्र प्रयासले हुन नसकेको कुरा बाह्य जगतसँग हातेमालो गरेर कसरी अघि बढ्न चाहन्छ भन्ने कुरा बैठकमा स्पष्ट रूपमा राख्ने उहाँले बताउनुभयो । नेपालले आफैँले बनाएको संविधान र त्यस प्रतिको प्रतिबद्धता स्पष्ट रूपमा राख्ने उहाँले जानकारी दिनुभयो ।
आफ्ना जायज र न्यायोचित राष्ट्रिय हित भित्र रहेर आफूले कुरा राख्ने ओलीले बताउनुभयो । राष्ट्रिय हितमा तलमाथि पर्न नदिने गरी आफ्नो धारणा राख्ने ओलीले प्रतिबद्धता व्यक्त गर्नुभयो । नेपाले असल छिमेकीको रूपमा रहने चाहेको र नेपालले पनि छिमेकीबाट त्यही अपेक्षा गरेको कुरा पनि स्पष्ट शब्दमा बैठकमा राख्ने ओलीले बताउनुभयो ।
बैठकमा मानव जाति र धर्तीको सुरक्षित भविष्यको बारेमा छलफल गर्ने उहाँले बताउनुभयो । त्यसका निम्ति बालबालिका र वातावरणको विषयलाई आफूले राम्रोसँग प्रस्तुत गर्ने ओलीले बताउनुभयो ।
हिमाल पग्लने र समुन्द्रको सतह बढेको विषयलाई नेपालले आफ्नो दृष्टिकोण प्रस्तुत गर्ने ओलीले बताउनुभयो । हिमालमा हिउँ नअडिएको कारण समुद्रको सतह उक्सिएको र त्यसले पार्ने समस्या र समाधानको उपायको बारेमा नेपालले स्पष्ट कुरा राख्ने उहाँले स्पष्ट पार्नुभयो । वातावरणको सवालमा नेपालको हिमालयको समस्याका बारे आफूले कुरा राख्ने ओलीले बताउनुभयो ।
ड्रग्स र यसले पारेको प्रभावको बारेमा पनि आफूले कुरा राख्ने ओलीले बताउनुभयो ।
भ्रमणको क्रममा अमेरिकाका विभिन्न विश्वविद्यालयका कार्यक्रममा पनि बोल्ने उहाँले जानकारी दिनुभयो । ती कार्यक्रममा नेपालको प्राज्ञिक धारणा राख्ने ओलीले स्पष्ट पार्नुभयो ।
