काठमाडौं । कृषि तथा पशुपंक्षी विकास मन्त्री रामनाथ अधिकारीले हालै आएकाे प्राकृतिक विपद्बाट ६ अर्ब रुपैयाँ बराबरको बालिनाली नोक्सानी भएकाे बताउनुभएकाे छ ।
बुधबार बसेकाे प्रतिनिधि सभाकाे कृषि, सहकारी तथा प्राकृतिक स्रोत समितिकाे बैठकमा बाेल्दै मन्त्री अधिकारीले विपद्बाट ६ अर्ब रुपैयाँ बराबरको बालिनाली नोक्शानी भएकाे प्रारम्भिक अनुमान रहेकाे बताउनुभयाे ।
किसानहरुलाई राहत दिने कुरामा मन्त्रालयमा गम्भीरतापूर्वक छलफल भइरहेको भन्दै उहाँले यसको व्यवस्थापनका विषयमा दातृ संस्थाहरूसँग पनि अनुरोध गरिएकाे जानकारी दिनुभयाे । 'हालको डाटा अनुसार अहिलेलाई अन्नबालीमा ६ अर्ब रुपैयाँ नोक्सानी भएको छ, तर आगामी दिनमा नोक्सानीमा पर्नु भएका किसानहरुलाई कुन तहको राहत दिन सक्छौं, कसरी दिन सकिन्छ यसतर्फ गम्भीरता पूर्वक सोचेका छौं, मन्त्रालयमा छलफल पनि भएको छ, यसको व्यवस्थापनका विषयमा दातृ संस्थाहरुसँग हामीले अनुरोध गरेका छौं'- मन्त्री अधिकारीले भन्नुभयाे ।
यस विषयमा समितिबाट जे निर्देशन भए पनि त्यसलाई पालना गर्न मन्त्रालय तयार रहेको उहाँले बताउनुभयाे । किसानहरू एकदमै पीडामा परेको र के खाने र कसरी बस्ने भन्ने अवस्थामा पुगेको भन्दै मन्त्री अधिकारीले यस विषयमा छिटो भन्दा छिटो काम अगाडि बढाउनु पर्ने पनि बताउनुभयाे । '१२ गते हामीले टेलिफोनमा मात्र सम्पर्क गरेका थियौँ, मन्त्रालय अन्तरगत देशभर रहेका सबै तहका साथीहरूसँग टेलिफोनमा सम्पर्क भयो र १३ गते मात्र हामी बैठक बस्याैँ, सबैभन्दा महत्त्वपूर्ण कुरा भनेको यो नोक्सानी भएका व्यक्तिहरू जुन किसानहरू हुनुहुन्छ, पीडामा परेर टेलिफोनमै रुनु पनि भएको छ, अब हामीले दशैं कसरी मनाउने र अब के प्राप्त हुन्छ भन्ने खालको प्रश्न पनि आएको'- उहाँले भन्नुभयाे ।
