काठमाडाैं । राष्ट्रिय सभा अध्यक्ष नारायण प्रसाद दाहाल र स्वीजरल्याण्डको नेसनल काउन्सिलका अध्यक्ष एरिक नसबाउमरबीच द्विपक्षीय भेटवार्ता भएको छ ।
अन्तर-व्यवस्थापिका संघको महासभामा सहभागी हुन जेनेभामा रहनुभएका अध्यक्ष दाहाल र स्वीस नेसनल काउन्सिलका अध्यक्ष एरिकबीच बुधबार भेटवार्ता भएकाे हाे ।
भेटवार्तामा द्विपक्षीय र आर्थिक सम्बन्ध, अन्तर्राष्ट्रिय मुद्दा, बहुपक्षीय सहयोगका साथै नेपालको शान्ति प्रक्रियामा स्वीस सरकारको सहयोगका बारेमा छलफल भएको अध्यक्ष दाहालकाे सचिवालयले जनाएकाे छ ।
सो अवसरमा अध्यक्ष दाहालले नेपालको द्वन्द्व व्यवस्थापन र शान्ति प्रक्रियामा स्वीस सरकारले महत्वपूर्ण सहयोग गरेको भन्दै नेपाली जनताको तर्फबाट धन्यवाद दिनुभयाे ।
संयुक्त राष्ट्रसंघ, आइपीयू लगायत बहुपक्षीय मञ्चहरुमा नेपाल र स्वीजरल्याण्डले आपसी सहयोग र सहकार्य गर्दै आइरहेको भन्दै अध्यक्ष दाहालले आगामी दिनमा पनि दुई देशबीचको पारस्परिक हित र मैत्रीपूर्ण सम्बन्धलाई थप सुदृढ पार्न द्विपक्षीय, क्षेत्रीय र बहुपक्षीय तहमा स्विट्जरल्याण्डसँग काम गर्न नेपाल सधैं तयार रहेको बताउनुभयाे ।
प्रत्यक्ष लोकतन्त्र र संघीयताको अभ्यासमा स्वीट्जरल्याण्ड विश्वकै सफल उदाहरण भएको बताउँदै अध्यक्ष दाहालले भन्नुभयाे - 'संघीय गणतन्त्रको रुपमा भर्खरै अभ्यास गरिरहेको नेपालले स्वीट्जरल्याण्डका असल अभ्यास बुझ्न र सिक्न प्रयासरत छ, हामी लोकतन्त्रको सुदृढीकरण र लोकतान्त्रिक संस्थालाई जनस्तरसम्म सुदृढ गर्न प्रयास गरिरहेका छौं ।'
राज्यको शासकीय संरचनामा सीमान्तकृत वर्गको सहभागिता गराउन समावेशी सिद्धान्त लागू गरिरहेको भन्दै उहाँले संघीय संसद् र प्रदेश सभामा ३३ प्रतिशत र स्थानीय तहमा ४१ प्रतिशत महिला प्रतिनिधित्व सुनिश्चित गरिएको बताउनुभयाे ।
संक्रमणकालीन न्यायका लागि द्वन्द्वपीडितलाई न्याय र क्षतिपूर्ति दिन नेपाल सरकार प्रतिबद्ध रहेको भन्दै अध्यक्ष दाहालले संघीय संसद्का दुवै सदनले संक्रमणकालीन न्यायसम्बन्धी विधेयक सर्वसम्मतिले पारित गरेको जानकारी गराउनुभयाे । 'शान्ति प्रक्रियाका बाँकी काम पूरा गरिहामी दिगो शान्ति, स्थायित्व र विकासको लक्ष्यतर्फ अघि बढेका छौं, नेपालको शान्ति प्रक्रियालाई पूर्णता दिन स्वीस सरकारको महत्त्वपूर्ण सहयोग हुनेछ भन्ने हामीले अपेक्षा लिएका छौं'- उहाँलेे भन्नुभयाे ।
