काठमाडाैं । सभामुख देवराज घिमिरेले संसदीय समितिहरुलाई समितिमा विचाराधीन विधेयकमाथिको छलफल सकेर संसद्मा पेस गर्न निर्देशन दिनुभएकाे छ ।
संसदीय समितिका सभापति र प्रमुख दलका प्रमुख सचेतक तथा सचेतकहरूलाई साेमबार सिंहदरबारस्थित आफ्नो कार्यकक्षमा बोलाएर सभामुख घिमिरेले समितिमा रहेका सबै विधेयकलाई पारित गरेर संसद्काे आगामी अधिवेशनमा पेस गर्न निर्देशन दिनुभएकाे हाे ।
बैठकमा सभामुख घिमिरेले कुन समितिमा कति विधेयक छन् ? त्यसलाई पास गर्न कति समय लाग्छ ? भनेर चासो देखाउनुभएको उद्योग तथा वाणिज्य र श्रम तथा उपभोक्ता हित समितिका सभापति अब्दुल खानले जानकारी दिनुभयो ।
बैठकमा समिति सभापतिहरुले संसद् अधिवेशन अन्त्य भएसँगै बैठक बस्न नसकेको जानकारी सभामुखलाई दिनुभएको थियो । उद्योग तथा वाणिज्य र श्रम तथा उपभोक्ता हित समितिका सभापति खानले भन्नुभयो- 'हामी समितिका सभापतिहरु अधिकांश सांसद गृह जिल्ला गएकाले बैठक बस्न कोरम समेत नपुगेको कुरा सभामुखसँग राख्यौं ।'
एमालेका प्रमुख सचेतक बर्तौलाले सभामुखले विशेषगरी संसदीय समितिको बैठक राख्नका लागि निर्देशन दिनुभएको जानकारी दिनुभयो ।
सभामुख घिमिरेले दफावार छलफलका लागि विधेयक रहेका समितिका सभापतिहरू र प्रमुख दलका प्रमुख सचेतक तथा सँग छलफल गर्नुभएको हो । संसद्को आगामी अधिवेशनमा बिजनेसको अभाव हुन नदिन सभामुखले सभापतिहरूलाई छलफलमा बोलाउनुभएको हो ।
छलफलमा उपसभामुख इन्दिरा राना, संसदीय समितिका सभापतिहरू, एमालेका प्रमुख सचेतक महेश कुमार बर्तौला, कांग्रेस प्रमुख सचेतक श्यामकुमार घिमिरे र माओवादी केन्द्रका प्रमुख सचेतक पाण्डे लगायत सहभागी हुनुहुन्थ्याे ।
संघीय संसद्का १४ वटा विषयगत समितिमा हाल १८ वटा विधेयक विचाराधीन छन् । तीमध्ये १४ वटा प्रतिनिधि सभाका विषयगत समिति र ४ वटा राष्ट्रिय सभाका विषयगत समितिमा विचाराधीन अवस्थामा छन् ।
