काठमाडौं । प्रतिनिधि सभामा जनमत पार्टीको संसदीय दलका नेता डा.सिके राउतले नेपालको संसद् स्वतन्त्र हुन नसकेको बताउनुभएको छ ।
शुक्रबार प्रतिनिधिसभाको बैठकमा बोल्दै उहाँले संसद् सरकारले चाहँदा मात्र चल्ने अवस्था रहेको बताउनुभयो । ‘व्यवस्थापिका, न्यायपालिका, कार्यपालिका छुट्टै चल्न सक्ने भनेर मान्छौँ तर यहाँ संसद्को साँचो सरकारले नै बोक्दो रहेछ, सरकारले अधिवेशन नबोलाउँदासम्म संसद् सुचारु नहुने खालको व्यवस्था छ’, उहाँले भन्नुभयो ।
उहाँले व्यवस्थापिका मात्र होइन न्यायपालिकाको काममा पनि सरकारले हस्तक्षेप गर्ने गरेको बताउनुभयो । ‘शक्ति पृथकीकरणको कुरा त गर्छौ तर न्यायालयले पहिले सरकारको फोन कुरेर बस्नुपर्ने अवस्था छ, मान्छेलाई हिरासतमा पठाउने कि पुर्पक्षमा पठाउने भनेर सरकारकै अधिकारीबाट जानकारी लिएर फैसला गर्नुपर्ने अवस्थामा छौँ’, उहाँले भन्नुभयो ।
उहाँले सिंहदरबारमा सर्वसाधारणको पहुँच नभएको नभएको बताउनुभयो । सर्वसाधारणको मात्र होइन सिंहदरबारमा बस्ने मन्त्रीहरिसँग राजनीतिक दलका राष्ट्रिय दलका अध्यक्ष र सांसदहरूको समेत पहुँच नभएको उहाँको भनाइ छ ।
सरकारले अध्यादेश ल्याएर कुनै उथलपुथल नल्याएको उहाँले बताउनुभयो । सरकारले कामका लागि अध्यादेश ल्याएको बताउँदै उहाँले त्यसको स्वागत गर्नुभयो । संसदमा प्रतिस्थापन विधेयक मार्फत त्यसलाई परिमार्जन गरेर पास गर्न सकिने राउतको भनाइ छ ।
उहाँले अहिले पनि नेपालमा रंगभेद भएकाे बताउँदै याे नस्लवादी साेच परिवर्तन आवश्कय रहेकाे बताउनुभयाे । मेधेशी समुदायका मानिसलाई सिंहदरबारमा समेत रंग हेरेर व्यवहार गरिने उहाँकाे भनाइ छ ।
