काठमाडौं । नेपाली कांग्रेसका सांसद अर्जुननरसिंह केसीले नेपाल विद्युत प्राधिकरण ऐन २०४१ बमोजिम, २० प्रतिशत शेयर सर्वसाधारण जनतालाई वितरण गर्न माग गर्नुभएकाे छ ।
बिहीबार बसेको प्रतिनिधि सभा बैठकको शुन्य समयमा बोल्दै सांसद् केसीले नेपाल विद्युत प्राधिकरण ऐन २०४१ बमोजिम सर्वसाधारण जनतालाई सेयर जारी गर्नुपर्नेमा ४० वर्षदेखि हुन नसकेको भन्दै तत्काल वितरण गर्न माग गर्नुभयाे ।
'नेपाल विद्युत प्राधिकरण ऐन २०४१ बमोजिम सर्वसाधारण जनतालाई शेयर जारी गर्नुपर्ने यो ४० वर्षदेखि हुन सकेको छैन, अहिले नेपाल विद्युत प्राधिकरणको झण्डै ७ खर्बको २० प्रतिशत मात्रै शेयर जनतामा वितरण गर्न सक्यौ भने डेढ खर्ब रुपैयाँ जम्मा हुने स्थिति छ, देश विदेशमा रहेको साधन स्राेत अरु ठूला मझौला विद्युतमा राज्यले उपयोग गर्न सक्ने जुन थिति छ, त्यतातिर सरकार मौन छ, तत्काल ४० वर्ष अगाडिको काननुअनुसार २० प्रतिशत शेयर वितरण गरियोस्'- उहाँले भन्नुभयाे ।
