काठमाडाैं । प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल प्रचण्डले वर्तमान सरकारले राजनीतिक प्रतिशाेध लिन खाेजेकाे बताउनुभएकाे छ ।
बिहीबार बसेकाे प्रतिनिधि सभा बैठकमा समय लिएर बाेल्दै अध्यक्ष प्रचण्डले सहकारीबाट पैसा ल्याउन प्रत्यक्ष रुपमा कतै नजोडिएका रास्वपा सभापति रवि लामिछानेलाई सरकारले देशको सबैभन्दा ठूलो सहकारी ठगका रूपमा देशभर दौडाइरहेको आराेप लगाउनुभयाे ।
अहिलेकाे सरकार राजनीतिक प्रतिशाेध लिने कुरामा मात्र बलियाे भएकाे आराेप उहाँले लगाउनुभयाे । 'सरकार आजभाेलि बलियाे त्यतिबेला देखिन्छ जब कसैसँग राजनीतिक प्रतिशाेध लिनुपर्ने हुन्छ, त्याे सबै भन्दा ठूलाे उदाहरण रास्वपाका सभापति रवि लामिछाने हुनुहुन्छ, सहकारीबाट पैसा ल्याउन प्रत्यक्ष कतै नजाेडिएका उहाँलाई आज देशैकै ठूला सहकारी ठगका रुपमा देशभरी दाैडाइँदैछ, हिजाे उहाँलाई ठूलाे ठूलाे अफर गरेकाहरु आज न्यायपालिकालाई धम्क्याएर भएपनि फसाइछाड्ने कसरतमा हुनुहुन्छ, त्यसकाे लागि सिंगाे राज्यकाे दुरुपयाेग भएकाे छ'- प्रचण्डले भन्नुभयाे ।
अदालतले धराैटीमा छाडिसकेपछि रविकाे सांसद् पद निलम्बन कति संवैधानिक र न्यायपूर्ण छ भन्ने पुन: समीक्षा हुनुपर्ने उहाँले बताउनुभयाे ।
राजनीतिक प्रतिशाेध र पूर्वाग्राहबाट सम्पत्ति शुद्धीकरणकाे आराेप लाग्ने र त्यसबाट सांसद् पद निलम्बन भइहाल्ने हाे भने भाेलि यसकाे कुन तहसम्मकाे दुरुपयाेग हाेला भन्ने प्रचण्डकाे प्रश्न छ ।
