काठमाडौं । उपप्रधान एवं अर्थमन्त्री विष्णु पौडेलले नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री केपी शर्मा ओलीमाथि लगाएका आरोप पुष्टि गर्न चुनौती दिनुभएकाे छ ।
बिहीबार बसेकाे प्रतिनिधि सभा बैठकमा बोल्दै अर्थमन्त्री पौडेलले सदनकाे राेष्टममा उभिएर प्रधानमन्त्रीमाथि लगाएका अनुचित आराेप पुष्टि गर्न नसके प्रचण्डले माफी माग्नुपर्ने बताउनुभयाे । उहाँले भन्नुभयाे - 'सम्माननीय प्रधानमन्त्री केपी शर्मा ओलीविरुद्ध लक्षित गरेर उहाँ (प्रचण्ड) ले जे-जस्ता अनुचित आरोप लगाउनुभएको छ, म चुनाैतीका साथ भन्छु- उहाँले पुष्टि गर्नुस्, यदि सक्नुहुन्न भने यही रोष्ट्रममा उभिएर नेपाली जनतासामू माफी माग्नुपर्छ उहाँले ।'
आराेप लगाउनेले आराेप पुष्टि गर्न सक्नुपर्ने भन्दै मन्त्री पाैडेलले प्रचण्डले आराेप पुष्टि गर्न नसक्ने बताउनुभयाे । सदन आक्राेश व्यक्त गर्ने, कुण्ठा व्यक्त गर्ने, तथ्यहीन आराेप लगाउने र भ्रम छर्ने ठाउँ नभएकाे उहाँले बताउनुभयाे ।
अध्यादेश संविधान र कानुनमा टेकेर संसद् नभएका बेला ल्याइएकाे अर्थमन्त्री पौडेलले प्रष्ट पार्नुभयाे । लाेकतन्त्रकाे उल्टाे व्याख्या नगर्न उहाँले चेतावनी दिनुभयाे । राजनीतिक आग्रहका लागि आराेप लगाइनु गलत भएकाे मन्त्री पाैडेलले बताउनुभयाे । तथ्यमा टेकेर मात्र बाेल्न समेत उहाँले प्रचण्डलाई आग्रह गर्नुभयाे ।
आफूले शासन गर्दा जे गर्नुहुन्थ्यो त्यही सम्झिएर प्रचण्डले सरकारकाे आलाेचना गरेकाे मन्त्री पाैडलले बताउनुभयाे । उहाँले भन्नुभयाे - 'घरि के भन्नुहुन्छ घरि के, सायद उहाँले आफूले शासन गर्दा जे गर्नुहुन्थ्यो, जसरी जसकाे प्रभावमा उहाँले निर्णय गर्नुहुन्थ्याे, त्यही सम्झिनुभएको हो कि ।'
याे सरकार सुशासन, पारदर्शिता, जनता र राष्ट्रका बृहत् हितमा विश्वास गर्ने मन्त्री पाैडेलले बताउनुभयाे । प्रचण्डले जनतातिर फर्कियाैं भनेपनि उहाँकाे अभिव्यक्तिकाे सार सरकारतिरै भएकाे भन्दै उहाँले प्रचण्डबाट सत्ता काेशाैं टाढा पुगेकाे बताउनुभयाे ।
