काठमाडौं। राष्ट्रिय स्वतन्त्र पार्टी (रास्वपा) का कार्यवाहक सभापति डाेलप्रसाद (डीपी) अर्यालले सभापति रवि लामिछानेको सांसद् पद निलम्बन फुकुवा गर्न माग गर्नुभएकाे छ ।
शुक्रबार बसेकाे प्रतिनिधि सभा बैठककाे शून्य समयमा बाेल्दै सांसद् अर्यालले सरकारको रवैयालाई संसद्ले समर्थन गरेकाे भन्दै आपत्ति जनाउनुभयाे । 'उहाँमा सरकारले त प्रतिशोध साध्यो, सार्वभौम संसद्ले पनि सरकारको रवैयालाई समर्थन जनाएको हो कि भन्ने महशुस भएको छ, चौथो ठूलो दलको सभापतिमाथि सरकारको यो हदसम्मको प्रतिशोधको मूल्य सरकारले पक्कै चुकाउनुपर्नेछ, झूटा मुद्दा लगाएर फसाउने सरकारको कुनियत सबैले बुझिसकेका छन्, सरकारको यस्ताे रबैयालाई संसद्ले समर्थन नगरोस् ।'
प्रतिनिधि सभा नियमावलीअनुसार थुनामा नरहेको बेलामा सांसद् पद निलम्बन नहुने व्यवस्थालाई कार्यान्वयन गर्दै तत्काल निलम्बन फुकुवा गर्न अर्यालले माग गर्नुभयाे ।
