काठमाडौं । प्रतिनिधि सभा सदस्य रामहरि खतिवडाले नेपाल प्रहरीलाई स्वतन्त्र रूपले काम गर्न सक्ने व्यावसायिक संगठन बनाउनु पर्ने बताउनुभएको छ ।
सोमबार प्रतिनिधि सभा बैठकमा नेपाल प्रहरी सम्बन्धी कानुलाई संशोधन र एकीकृत गर्न बनेको विधेयक माथिको सामान्य छलफलमा बोल्दै खतिवडाले प्रहरीलाई जो मन्त्री भयो त्यसको पछि पछि हिँड्ने संगठन होइन पेसागत धर्ममा हिँड्ने संगठन बनाउनु पर्ने बताउनुभयो । नेपालमा प्रहरीको भूमिका सराहनीय भएको बताउँदै उहाँले कहिलेकाहीँ एउटा च्याप्प समातेर फुली लगाइदिने र अर्कालाई पठाउने काम भएको भन्दै त्यसलाई कानुनले नै रोक्ने व्यवस्था गर्नुपर्ने खतिवडाले धारणा राख्नु भयो ।
प्रहरी संगठन कसैको स्वविवेकीय अधिकारमा चल्नु नहुनेमा उहाँले जोड दिनुभयो । ‘प्रहरीलाई स्वविवेकीय होइन स्वचालित पद्धतिमा चल्ने गरी विकसित गराउनु आजको आवश्यकता हो’, उहाँले भन्नुभयो ।
प्रहरीको मनोबल गिर्ने गरी राजनीतिक नेतृत्वले आफ्नो विवेकमा प्रहरी चलाउन नहुने उहाँले बताउनुभयो । मन्त्रीहरूले आफ्नो स्वविवेकमा प्रहरीलाई हाइजम्प र लमजम्प गराउने कुरा रोक्नु पर्ने उहाँको धारणा छ ।
