काठमाडौं । प्रतिनिधि सभा सदस्य रामहरि खतिवडाले दुर्घटनामा घाइते हुने बिरामीहरूको उपचार सरकारले निःशुल्क उपचार गर्नुपर्ने बताउनुभएको छ ।
मंगलबार प्रतिनिधि सभा बैठकमा बोल्दै उहाँले दुर्घटनामा परेका नागरिकहरूको उपचारमा समस्या भएको बताउँदै यसमा सरकार जिम्मेवार हुनु पर्ने बताउनुभयो । यातायात व्यवसायीले बिरामीको उचित उपचार नगरिदिँदा अस्पतालमा ठुलो बिल उठ्ने र बिरामीको बिचल्ली हुने गरेको उहाँले बताउनुभयो ।
खतिवडाले मंगलबार काठमाडौंबाट ओखलढुङ्गा हिँडेको बस दुर्घटना भएको प्रति पनि दुःख व्यक्त गर्दै घाइतेको स्वास्थ्य लाभको कामना गर्नुभयो । बिरामीको उचित र निःशुल्क उपचारको प्रबन्ध गर्न पनि उहाँले माग गर्नुभयो ।
देशव्यापी रूपमा लागु गरिएको राष्ट्रिय परिचयपत्र अनिवार्य गर्दा ज्येष्ठ नागरिक समस्यामा परेकाले ७० वर्ष माथिकालाई त्यो अनिवार्य नगर्न आग्रह गर्नुभयो । यदि यसलाई अनिवार्य गर्ने हो भने प्रत्येक वडामा गएर परिचयपत्र दिनु पर्ने उहाँको सुझाव छ ।
