काठमाडौं । प्रतिनिधि सभा सदस्य हरि ढकालले सरकारले राष्ट्रिय स्वतन्त्र पार्टीका सभापति रवि लामिछानेमाथि दुराग्रहपूर्ण व्यवहार गरेको बताउनुभएको छ ।
मंगलबार प्रतिनिधि सभाको बैठकमा बोल्दै ढकालले लामिछानेलाई जस्तो पूर्वाग्रह राखेर मुद्दा लगाउने हो भने पुराना दलका कुनै पनि नेताले देशमा टाउके लुकाउने ठाउँ पनि नपाउने दाबी गर्नुभयो । ‘हाम्रो पार्टी सभापतिलाई जस्तै गरी होइन, अलिकति अनुसन्धान प्रक्रियामा ल्याऊँ त तपाईँहरूले टाउको लुकाउने ठाउँ पनि पाउनु हुने छैन देशमा’, उहाँले भन्नुभयो ।
राष्ट्रिय स्वतन्त्र पार्टी सरकारमा पुगेपछि पुराना भ्रष्टाचारी कसैलाई पनि नछाड्ने उहाँले बताउनुभयो । अहिले मत नपुगेको कारण आफूहरू पछि परेको बताउँदै उहाँले २०८४ को निर्वाचनमा मत पुर्याएर आउने, सरकार चलाउने र भ्रष्टहरूलाई देशमा टाउको लुकाउन समेत नदिने बताउनुभयो ।
उहाँले अहिलेको सरकार भ्रष्टाचारको फाइल बन्द गर्नको लागि बनेको पनि आरोप लगाउनुभयो । यो सरकारबाट देश र जनताको पक्षमा काम नहुने ढकालले दाबी गर्नुभयो ।
