कुनै पनि मन्त्री उपस्थित नभएपछि प्रतिनिधि सभा बैठक १५ मिनेट स्थगित

काठमाडौं । बुधबारको प्रतिनिधि सभा बैठक सुरु हुने बित्तिकै स्थगित भएको छ ।

बैठकमा सरकारका कुने पनि मन्त्री उपस्थित नभएपछि बैठक स्थगित भएको हो । बिहान ११ बजे बोलाइएको बैठकमा सरकार प्रतिनिधि उपस्थित नभएको भन्दै माओवादी केन्द्रका प्रमुख सचेतक हितराज पाण्डेले अपपत्ति जनाउनुभएको थियो । त्यस पछि सभामुखले १५ मिनेटका लागि बैठक स्थगित गर्नुभएको हो ।

प्रतिनिधिसभा नियमावलीमा बैठकमा सरकारका प्रतिनिधि अनिवार्य उपस्थितिको प्रावधान छ । पाण्डेले मन्त्रीहरू अनुपस्थित भएर सदनलाई हेपेको टिप्पणी गर्नुभयो । ‘सरकार सदनलाई हेपी रहेको छ, सरकार हामी जनप्रतिनिधिलाई हेपिरहेको छ, हाम्रा अभ्यासहरू सरकार मानिरहेको छैन’, उहाँले भन्नुभयो ।

१५ मिनेट स्थगित भएको बैठक मन्त्री उपस्थिति भएपछि पुनः सुरु भएको छ ।