काठमाडौं । प्रतिनिधि सभा सदस्य जुलीकुमारी महतो महासेठले समाप्त भइसकेको राजतन्त्र अब फर्कन नसक्ने बताउनुभयो ।
आइतबार प्रतिनिधि सभा बैठकमा बोल्दै महतोले लोकतन्त्रको सूर्य झलमल्ल लागि रहेको बेला सबैले सल्काएको मैनबत्तीले कुनै अर्थ नराख्ने बताउनुभयो । ‘लोकतन्त्रको सूर्य चम्की रहँदा केहीले अझै राजतन्त्रको मैनबत्ति सम्झिरहेका छन्’, उहाँले भन्नुभयो ।
नेपाल लोकतन्त्र मार्फत समृद्ध नेपाल, सुखी नेपालीको बाटोमा अघि बढेको उहाँले बताउनुभयो । ‘लोकतन्त्रको प्रभाव देखेर अन्धकारमा फर्कन चाहनेहरूलाई म भन्न चाहन्छु जसरी पश्चिमबाट सूर्य उदाउन सक्दैन, त्यसरी नै समाप्त भइसकेको राजतन्त्र फर्कन सक्दैन’, उहाँले भन्नुभयो ।
लोकतन्त्र प्राप्ति पछि देशले प्राप्त गरेको विकास र समृद्धि घामजस्तै छर्लङ्ग भएको उहाँले बताउनुभयो । यसलाई कसैले छोप्न नसक्ने महतोले स्पष्ट पार्नुभयो ।
