काठमाडौं । प्रतिनिधि सभा सदस्य माधव सापकोटाले २५ करोड बारबारको अवैध रकम बरामद भएको घटनाको छानबिन गर्न विशेष समिति बनाउन माग गर्नुभएको छ ।
बुधबार प्रतिनिधि सभाको बैठकमा बोल्दै सापकोटाले यति ठुलो मात्राको तस्करी उपल्लो तहको कनेक्सन नभई सम्भव नहुने बताउनुभयो । सो घटनामा जसको संलग्नता भए पनि छानबिन गरी कारबाहीको दायरामा ल्याउन उहाँले माग गर्नुभयो । ‘यो घटनाले सिङ्गै देशलाई तरङ्गित बनाएको छ, यो सरकार प्रति प्रतिपक्षको आशङ्का थियो र छ, घटनाले संगठित अपराधको जालो कुन स्तरमा संगठित भएर झांगिरहेको छ भन्ने कुराको चित्र बाहिर आएको छ, यो घटनाप्रति हाम्रो पार्टीको तर्फबाट ध्यानाकर्षण भएको छ, यति ठुलो मात्राको तस्करी उपल्लो तहको कनेक्सन नभई सम्भव छैन, त्यसैले गम्भीर रूपमा छानबिनको लागि माग गर्दछौँ’, उहाँले भन्नुभयो ।
अहिलेसम्म यस्ता घटनामा संलग्न भरिया र ड्राइभर मात्रै पक्राउ परेका बताउँदै उहाँले उहाँले ठुलो काण्ड डिसमिस पार्ने गरिएको प्रति ध्यानाकर्षण गराउनुभयो । राजस्व अनुसन्धान प्रधानमन्त्री कार्यालय मातहतमा भएकाले त्यसले काम गर्न नसक्ने बताउँदै उहाँले विशेष छानबिन समिति निर्माण गरेर जोसुकै भए पनि कारबाही गर्न माग गर्नुभयो ।
मंगलबार अमेरिकी डलर र युरो सहित करिब २५ करोड रुपैँया सहित सिन्धुपाल्चोकको भोटेकोसी गाउँपालिका–१ का ४३ वर्षीका फुच्चे भन्ने कुसाङ लामालाई प्रहरीले टोखाबाट पक्राउ गरेको छ ।
