काठमाडौं । प्रतिनिधि सभा सदस्य रामहरि खतिवडाले पूर्वराजा ज्ञानेन्द्र शाहले संविधान विपरीत काम गरेकाले कारबाहीको दायरामा ल्याउनु पर्ने माग गर्नुभएको छ ।
बिहीबार प्रतिनिधि सभा बैठकमा बोल्दै खतिवडाले पूर्वराजा ज्ञानेन्द्रले आफूलाई श्री ५ महाराजाधिराज भनेको र शाही निशाना समेत प्रयोग गरेकोले ज्ञानेन्द्रलाई कारबाहीको दायरमा ल्याउनु पर्ने माग गर्नुभयो । श्री ५ र शाही निसाना २०६५ सालमा नै हटेकोले त्यसको प्रयोग गैरकानुनी भएको उहाँले स्पष्ट पार्नुभयो । नेपालको संविधानमा काहीँ पनि श्री ५ महाराजाधिराज भन्ने उल्लेख छैन, त्यसैले श्री ५ महाराजाधिराज भनेर राख्ने र शाही निशाना झण्डा राख्ने प्रति घोर आपत्ति छ, सरकारले त्यस्ता कार्य नगर्न र संविधान नमिच्न आग्रह गरोस् भन्ने चाहन्छु’, उहाँले भन्नुभयो ।
शाही निशानको झण्डा हटाएर राष्ट्रिय झण्डा फहराएको कुरालाई अपमान गरे पुनः संविधान मिच्दै शाही निशानको झण्डा फहराउने पूर्वराजालाई कारबाही गर्न उहाँले माग गर्नुभयो ।
