काठमाडौं । प्रतिनिधि सभामा सत्तारुढ दल कांग्रेसका प्रमुख सचेतक श्याम घिमिरेले अहिले देशमा अशान्ति मच्चाउन चाहने तत्त्वहरूले सरकार परिवर्तनको हल्ला चलाइरहेका बताउनुभएको छ ।
शुक्रबार प्रतिनिधिसभाको बैठकमा बोल्दै उहाँले दैनिक सरकार परिवर्तनको हल्ला चलाएर मुलुकमा अस्थिरता सिर्जना गर्ने प्रयत्न भएको बताउनुभयो । ‘अहिले देशमा अशान्ति मच्चाउने तत्त्वहरूले एक किसिमको भाष्य निर्माण गर्दै छन्, दैनिक सरकार परिवर्तनको हल्ला चलाइरहेका छन्, विभिन्न वादीका नाममा देशमा अशान्ति मच्चाइ धमिलो पानीमा माछा मार्ने प्रयत्न विभिन्न कोणबाट भइरहेको देखिन्छ’, उहाँले भन्नुभयो ।
घिमिरेले अहिले सरकार परिवर्तनको कुनै सम्भावना नरहेको बताउँदै ढुक्क भएर काम गर्न सरोकारवालालाई आग्रह गर्नुभयो । कांग्रेस सरकारबाट नलगिँदासम्म सरकार परिवर्तन नहुने र कांग्रेस सरकारबाट अलग्गिने उहाँले स्पष्ट पार्नुभयो । कांग्रेस एमालेसँग भएको सहमतिको पक्षमा प्रतिबद्ध रहेको उहाँले जानकारी दिनुभयो ।
घिमिरेले संसद्को मुख्य काम कानुन बनाउनु भएको बताउँदै त्यसमा संसद् केन्द्रित हुनु पर्नेमा जोड दिनुभयो । संसद् कानुन बनाउने भन्दा बजेटमा बढी केन्द्रित भएको भन्दै उहाँले चिन्ता व्यक्त गर्नुभयो । ‘नेपालको संविधानले परिकल्पना गरेको व्यवस्थापिकाको मूल काम भनेको सरकार निर्माण गर्ने, विधायन सम्बन्धी काम गर्ने, बजेट निर्माण गर्ने एवम् सरकारको नीति तथा कार्यक्रमलाई पारित गर्ने नै हो तर परम्परागत रूपमा चल्दै आएको विकासे कार्यकर्ताको रूपमा संसद्को भूमिकामा परिवर्तन नआएको हुँदा सांसदप्रति जनताको धारणा संसद्को मूल भूमिकामा केन्द्रित हुन सकेको छैन’, उहाँले भन्नुभयो ।
