काठमाडौं । प्रतिनिधि सभा सदस्य ठाकुर गैरेले शिक्षक आन्दोलनलाई राजनीतिक रङ्ग नदिन आग्रह गर्नुभएको छ ।
मंगलबार प्रतिनिधि सभा बैठकमा बोल्दै गैरेले शिक्षकका जायज माग पूरा गर्न सत्तापक्ष र प्रतिपक्षको सामूहिक प्रतिबद्धताको खाँचो रहेको बताएको बताउनुभयो । शिक्षकका मागका विषयमा एकले अर्कालाई आरोप लगाएर उम्कन नमिल्ने उहाँको धारणा छ ।
शिक्षक आन्दोलनका माध्यमबाट सरकार ढाल्ने र त्यसकै जगबाट आफू प्रधानमन्त्री बन्ने कुचेष्टा नराख्न उहाँले आग्रह गर्नुभयो । ‘बैठकमा एउटा कुरा गर्ने सडकमा गएर अर्को कुरा गर्ने गर्दासम्म नेपालको शिक्षा क्षेत्रमा विकास हुँदैन’, उहाँले भन्नुभयो ।
शिक्षकका माग सबै एकै पटक पुरा गर्न सकिने अवस्था नरहेको कुरा शिक्षकहरूले पनि बुझ्नु पर्ने उहाँले बताउनुभयो । तर शिक्षकका आधारभूत माग पुरा गराउने कुरामा सरकार प्रतिबद्ध रहेको उहाँले स्पष्ट पार्नुभयो ।
सडकमा सुरक्षाकर्मी र शिक्षकहरूको बिचमा झडप गराएर घाइते हुने स्थितिको सिर्जना गरेर समस्याको समाधान नहुने उहाँले स्पष्ट पार्नुभयो । वार्ता र संवादबाट नै समस्या समाधान गर्नुपर्ने उहाँको धारणा छ ।
आजको प्रतिपक्षले सबैभन्दा बढी शिक्षा मन्त्रालय सम्हालेको र शिक्षा समितिको सभापति अहिलेको प्रतिपक्षी दलको सांसद नै रहनुभएको तथ्यलाई नबिर्सन पनि उहाँले आग्रह गर्नुभयो । अहिले संसदीय उपसमितिमा छलफलकै क्रममा रहेको विधेयकलाई टुङ्ग्याउनका लागि सबैको सामूहिक प्रतिबद्धताको खाँचो रहेको उहाँले स्पष्ट पार्नुभयो ।
