काठमाडौं । आज संघीय संसद्को संयुक्त बैठक बस्दै छ ।
आज ३ः०० बज बस्ने संघीय संसद्को संयुक्त बैठकमा सरकारको आगामी आर्थिक वर्षको नीति तथा कार्यक्रम प्रस्तुत हुँदै छ ।
राष्ट्रपति रामचन्द्र पौडेलले सङ्घीय संसद्को दुवै सदनको संयुक्त बैठकमा सरकारको नीति तथा कार्यक्रम प्रस्तुत गर्ने कार्यक्रम रहेको छ । नेपालको संविधान बमोजिम राष्ट्रपतिले सङ्घीय संसद्को दुवै सदनको संयुक्त बैठकमा सरकारको नीति तथा कार्यक्रम प्रस्तुत गर्ने व्यवस्था छ ।
सभामुख देवराज घिमिरेले दिनको २ः४५ बजे भित्र प्रतिनिधि सभाका सदस्यलाई आसनग्रहण गरिसक्न आग्रह गर्नुभएको छ ।
यस पटकको नीति तथा कार्यक्रममा रोजगारी सिर्जना, उद्यमशीलता प्रवर्द्धन, शिक्षा र प्रविधिमा लगानी, सार्वजनिक सेवा र सुशासन सुधार, शान्ति प्रक्रियालाई टुङ्गोमा पुर्याउने लगायतका विषयमा केन्द्रित हुने बताइएको छ ।
सरकारको नीति तथा कार्यक्रम वैशाख २२ देखि २८ गतेसम्म छलफल गरी पारित गर्ने कार्यसूची रहेको छ । जेठ १५ गते सरकारको आगामी आर्थिक वर्षको बजेट सङ्घीय संसद्को संयुक्त बैठकमा अर्थ मन्त्रीले प्रस्तुत गर्ने व्यवस्था छ ।
