शान्ता चाैधरी--
नेपालमा विभिन्न प्रकारका राजनीतिक अभ्याश भए । अहिले आएर दानवीय राजनीति पनि चल्न थालेको छ । अरुको स्वास्थ्य बिग्रियोस् भनेर सत्तोसराप गर्ने, अरुको मृत्युको कामना गर्ने दुखद राजनीतिक प्रवृत्ति नेपालमा सुरु भएको छ । जनमतमा जित्न नसकेपछि अरुको स्वास्थ्यलाई हतियार बनाएर आक्रमण गर्ने प्रयास भइरहेको छ ।
प्रसंग प्रधानमन्त्री केपी शर्मा ओलीमाथि गर्न थालिएको दानवीय आक्रमणको हो । लोकतान्त्रिक विधि प्रकृयामा परास्त भएपछि, आफ्नो राजनीतिक अभीष्ट पूरा नभएपछि, कुनै पनि तरिकाले प्रधानमन्त्री पदबाट ओलीलाई हटाएर मुलुकमा राजनीतिक अस्थिरता सुरु गर्न नसकिएपछि प्रधानमन्त्री ओलीको स्वास्थ्यलाई हतियार बनाउन खोजिँदैछ ।
तर, अरुले जति नै सत्तोसराप गरे पनि, जति नै अपशकुन कामना गरिए पनि प्रधानमन्त्री ओली झन स्वस्थ्य बनेको नेपाली जनताले देख्न पाएका छन् ।
अरुको मृत्युको कामना गर्नु, अरुलाई रोगविमार लागोस्, लागेको रोगविमार निको नहोस्, स्वास्थ्यको बहानामा पदबाट हटाउन पाइयोस् भन्नु दानवीय राजनीति हो । युद्धमा समेत विरामी विपक्षीको स्वास्थ्य लाभकोका कामना गरिन्छ । अहिले प्रधानमन्त्री ओलीमाथि गरिएको अनैतिक हमलाहरु दानवीयताको पराकाष्टा हो ।
प्रकृतिको रीत
कम्युनिष्टले ६० वर्ष पुगेका मानिस मार्छन् भनेर प्रचार गर्ने युग पनि थियो हाम्रो नेपालमा । कम्युनिष्टहरुले वृद्धवृद्धालाई मार्दैनौं, बरु झन सुविधा दिन्छौं, सम्मान दिन्छौं, अवसर दिन्छौं भन्दै खण्डन गर्नुपर्ने दिन थियो । अहिले वृद्धवृद्धा, रोगी, अशक्तलाई सबैभन्दा धेरै सुविधा र सम्मान दिने भनेर कम्युनिष्ट पार्टी स्थापित छ ।
मानिस बुढाबुढी बन्छन्, रोगी हुन्छन्, मर्छन् । यो सामान्य प्राकृतिक नियम हो । यो नियमलाई नेपालको कुनै पनि राजनीतिक दलले फेर्न सक्दैनन् । नेपाल कम्युनिष्ट पार्टी या नेपाली कांग्रेसको केन्द्रीय समितिले निर्णय गरेर आजको मितिबाट मानिस बुढाबुढी बन्दैनन् र रोग लाग्दैन भनेर निर्णय गरेर हुन्छ ? हुँदैन ।
आजको बालक भोलिको युवा हो । आजको युवा भोलिको वृद्धवृद्धा हो । आजको निरोगी भोलिको रोगी हो । आजको जिवित भोलिको मृत हो । प्रकृतिको रीत यही हो । यो रीत विरुद्ध जान सकिँदैन ।
राजनीति गर्ने मानिसलाई मात्र रोग लाग्ने हो र ? नेतालाई मात्र रोग लाग्ने होइन, जो कसैलाई लाग्छ । प्रधानमन्त्री पदमा बसेको मानिस मात्र विरामी हुने हो र ? राजनीतिमा रोगविमारलाई मिसाउनु अमानवीय काम हो ।
यति व्याख्या मैले प्रधानमन्त्री केपी शर्मा ओलीको प्रसंगमा लेखेकी हूँ । म आफैं पनि केही रोग भोगेर अनि रोगलाई जितेर यहाँसम्म आइपुगेकी हूँ । मृत्युको संघारमा पुगेर फर्किएकी हूँ । रोगलाई औषधी र आत्मबलले जित्न सकिन्छ भन्ने म आफैंले भोगेकी छु । तर, मलाई के पनि थाहा छ भने रोगलाई एउटा सीमासम्म मात्र जित्न सकिन्छ । अन्तिममा त रोग या मृत्युले जित्छ नै । यो शाश्वत सत्य पनि सबैले बुझ्न जरुरी छ ।
प्रधानमन्त्री ओलीले रोग विमारलाई औषधीको भरमा मात्र जितेको जस्तो लाग्दैन । आत्मबलले पनि जितेको हो भन्ने म बुझ्दछु । मानिस जति क्रियाशील हन्छ उसले रोगविमारलाई त्यति धेरै जित्न सक्छ ।
दानवीय विचार
कांग्रेसका केही नेताले केपी शर्मा ओलीले स्वास्थ्यका कारण अब सक्रिय राजनीति त्याग्नुपर्छ, पद छोड्नुपर्छ भनेर दानवीय कुरा गरेका छन् । त्यो दानवीय कुरातर्फ धेरैको ध्यानाकर्षण भएको छ ।
अहिले प्रतिनिधि सभा, राष्ट्रिय सभा र प्रदेश संसद्मा जति पनि सांसद्हरु छन्, उनीहरु प्राय सबैलाई कुनै न कुनै स्वास्थ्य समस्या अवश्य होला । केपी शर्मा ओलीलाई मात्र स्वास्थ्य समस्या भएको होइन । रोगविमार नलागेका तथा शतप्रतिशत निरोगी मानिसले मात्र राजनीतिक या अन्य खालको जिम्मेवारी समाल्ने मान्यता राख्ने हो भने नेपालमा कुनै पनि पदको जिम्मेवारी समाल्ने मानिस पाइने छैन ।
शतप्रतिशत निरोगी मानिसलाई जिम्मेवारी दियो भने पनि भोलि उसलाई रोगविमार लाग्ने नै छ । अनि के गर्ने ?
अस्वस्थ भएकै कारणले पद त्याग्नुपर्छ भन्नु दानवीय माग हो । यसो भन्नु भनेको तिमी कहिल्यै निको नहुनु भनेर श्राप दिनु हो । प्रधानमन्त्री केपी शर्मा ओलीलाई अहिलेको पदीय जिम्मेवारी आकाशबाट प्राप्त भएको होइन, धरती फाटेर फुत्त जिम्मेवारी प्राप्त भएको पनि होइन । नेपाली कांग्रेस समेत सहभागी निर्वाचन प्रकृयाबाट प्राप्त जनादेश मार्फत् केपी ओलीलाई प्रधानमन्त्री पदको जिम्मेवारी प्राप्त भएको तथ्य दानवीय कुरा गर्नेहरुले बुझ्न जरुरी छ ।
विसंचो भएको मौका पारेर पद छाडिदेउ भन्नु दानवीय विचार हो । विसंचो भएको बेला स्वास्थ्य लाभको कामना गर्ने हो कि मौका यही हो भनेर छिर्के लगाउन खाेज्ने ? नेपाली समाजले यस्तो दानवीय विचार तथा प्रवृत्ति पचाउन सक्दैन । तपाईंको घरमा विसंचो भएका मानिस छैनन् ? विसंचो भएका मानिसलाई हौसला दिने हो कि जाउ घाटतिर भन्ने हो ?
प्रधानमन्त्री ओली विरुद्ध दानवीय विचार व्यक्त गर्ने एक माननीय सदस्यले केही दिन अघि भनेको याद आउँछ । चिया खान बसेका थियौं, चिनी होलेको चिया खान्न भने उनले । गुनासो गर्दै उनले भने– एक छाक खाना जति त मैले औषधी नै खानुपर्छ । उनको म स्वास्थ्य लाभको कामना गर्छु । औषधी खान परेको कारणले उनलाई कसैले सांसद् पद छाडिदिनुस् भन्छ भने त्यो गलत हो भन्छु ।
विसंचो मानिसलाई विदा गरिदिनुपर्छ भन्ने विचार राख्नेहरुको कित्ताबाट प्रधानमन्त्री ओलीको मृत्यु कामना समेत आएको देखिन्छ । उनीहरुले त्यस्तो कामना गरेको देख्दा मलाई उहिले नै ‘कम्युनिष्टहरुले बुढाबुढीलाई मार्छन्’ भनी गरिने प्रचारको याद आउँछ । बुढाबुढी, रोगी, अशक्तहरुले बाँच्न हुँदैन, कुनै पनि जिम्मेवारी लिन हुँदैन भन्ने विचार कसको चाहिँ रहेछ भन्ने अहिले छर्लङग भएको छ ।
सक्रिय प्रधानमन्त्री
समकालीन नेपाली राजनीतिका शीर्ष व्यक्तित्वहरु सबैलाई म चिन्दछु । प्रधानमन्त्री रहिसकेकाहरुलाई पनि चिन्दछु । सबैको सक्रियता मैले देखेकी छु । केपी शर्मा ओलीको जस्तो उर्जा र सक्रियता विरलै मानिसमा हुन्छ । बिहान सखारैदेखि राति १२ बजेसम्म निरन्तर खट्नसक्ने क्षमता ओलीमा छ । ओलीको स्वास्थ्यमा विभिन्न समस्या होलान्, किनभने मानिस हो । स्वास्थ्य समस्यालाई जितेर मुलुकका लागि रातोदिन खटिरहने प्रधानमन्त्री ओलीलाई हतोत्साही बनाउने कि हौसला दिने ? तर, यहाँ त हतोत्साही बनाउने प्रयास भइरहेको छ । संगठित रुपमा तथा सुनियोजित रुपमा स्वास्थ्य अवस्थालाई लिएर प्रधानमन्त्री ओलीमाथि दानवीय हमला भइरहेको छ ।
घिनलाग्दो राजनीति
विगतमा नेपालमा अनेक विकृत राजनीति भइसकेको छ । अनेक विकृति विसंगतिले नेपाली समाजलाई घाइते बनाइसकेको छ । हिजो नेपालमा जातथरको राजनीतिक अभियान चलाइयो । अहिले आएर रोगविमार तथा स्वास्थ्यलाई हतियार बनाएर आक्रमण गर्ने घिनलाग्दो राजनीति भइरहेको छ ।
नेपालको राजनीतिमा शुद्धिकरण आवश्यक छ । राजनीतिक शुद्धिकरणको प्रस्थान विन्दु भनेको विधि प्रक्रिया पालना गर्ने हो । जनादेशलाई सम्मान गर्ने हो । जनादेशलाई चोरबाटोबाट अवज्ञा नगर्ने हो ।
यहाँनेर केही दिन अघिको चितवनको सुन्दर घटना याद आयो । पर्यटन मन्त्री योगेश भट्टराई र कांग्रेस नेता कृष्णप्रसाद सिटौला एकैपटक भरतपुर विमानस्थलमा पुगे । पहिले कृष्णप्रसाद सिटौलालाई स्वागत गरियोस् भनेर योगेशले सिटौलाप्रति उच्च सम्मान देखाए । उता भरतपुर विमानस्थलमा त्यस्तो संस्कार प्रदर्शन हुँदै थियो, यता काठमाडौंमा कांग्रेसका कतिपय जनप्रतिनिधिले दानवीय संस्कार प्रदर्शन गर्दै प्रधानमन्त्री ओलीको उपचारलाई हतियार बनाएर दानवीय आक्रमण गर्दै थिए ।
राजनीतिलाई सुन्दर बनाउँदै लैजानुपर्छ, घिनलाग्दो बनाउने काम गर्न हुँदैन । अरुको क्रियाशीलताको कामना गर्नुपर्छ, निष्क्रियताको कामना गर्न हुँदैन । अरुको स्वास्थ्यको कामना गर्नुपर्छ, रोग विमार लागोस्, विसंचो होस् भनेर सत्तोसराप गर्न हुँदैन । जीवनको कामना गरौं, मृत्युको होइन । सकारात्मक बनौं, नकारात्मक होइन ।
याद गरौं, शरीरको रोगले सम्बन्धित व्यक्तिलाई मात्र पीडा दिन्छ तर व्यक्तिमा भएको वैचारिक रोगले समाज र देशलाई नै पीडा दिन्छ ।
याे पनि पढाै--
केपी ओली अरु ५० वर्ष बाँच्नुपर्छ
स्याब्बास् सरकार ! धन्यवाद नेपाली सेना !!
