जबरालाई संगठित अपराधमा पक्राउ गरिएको स्रोतको दाबी, प्रहरी भन्छ– सुरक्षाका लागि ल्याएका हौं

काठमाडौं । पूर्वप्रधानन्यायाधीश चोलेन्द्र शमशेर जबरालाई काठमाडौं उपत्यका अपराध अनुसन्धान कार्यालयको टोलीले नियन्त्रणमा लिएको छ ।

स्रोतका अनुसार जबरालाई संगठित अपराधसम्बन्धी विषयमा पक्राउ गरिएको हो । यद्यपि प्रहरीले भने उनलाई पक्राउ गरिएको नभई सुरक्षाका लागि प्रहरीकहाँ ल्याइएको जनाएको छ ।

उपत्यका अपराध अनुसन्धान कार्यालयको टोलीले शनिबार राति महाराजगन्जस्थित जबराको निवासबाटै उहाँलाई नियन्त्रणमा लिएर प्रहरीकहाँ ल्याएको बताइएको छ ।

जबरालाई कुन विषयमा र के कारणले नियन्त्रणमा लिइएको हो भन्नेबारे प्रहरीले औपचारिक रूपमा विस्तृत जानकारी सार्वजनिक गरेको छैन ।