काठमाडौँ । नेपाली कांग्रेसको शुभेच्छुक संस्था नेपाल शिक्षक सङ्घका पूर्वअध्यक्ष मोहन ज्ञवालीको निधन भएको छ ।
दुई कार्यकाल नेपाल शिक्षक सङ्घका नेतृत्व गर्नुभएका ज्ञवालीको ५९ वर्षको उमेरमा गएराति हृदयघातका कारण निधन भएको नेपाल शिक्षक सङ्घका उपमहासचिव एव प्रवक्ता नारायण तिमिल्सिनाले जानकारी दिनुभयो ।
स्थायी घर गुल्मी भई कास्कीमा शिक्षक रहँदा ज्ञवाली शिक्षक सङ्घमा आबद्ध हुनुभएको थियो । विसं २०५३ देखि २०५७ सम्म कास्की जिल्ला अध्यक्ष हुनुभएकामा विसं २०५७ देखि २०६१ सम्म शिक्षक सङ्घको केन्द्रीय महासचिव र विसं २०६१ देखि २०६९ सम्म दुई कार्यकाल केन्द्रीय अध्यक्ष हुनुभएको थियो ।
नेपाली कांग्रेस गुल्मीका महाधिवेशन प्रतिनिधिसमेत रहनुभएका ज्ञवालीको शवलाई अहिले नेपाल शिक्षक सङ्घको केन्द्रीय कार्यालय धुम्बाराहीमा श्रद्धाञ्जलीका लागि राखिएको छ । उहाँको आजै हिन्दू परम्पराअनुसार पशुपति आर्यघाटमा अन्त्येष्टि गरिने परिवारले जनाएको छ ।
-रासस
