काठमाडौं । नेकपा एमालेले आज काठमाडौंमा गर्ने जागरण सभाको लागि मञ्च तयार गरेको छ ।
आज दरबार मार्गमा हुने जागरण सभाको लागि बिहीबार साँझबाट मञ्च तयार गर्ने काम सुरु भएको थियो । कार्यक्रमको मञ्च राति नै तयार भएको आयोजकले जनाएको छ ।
नेकपा एमाले काठमाडौं, भक्तपुर र ललितपुर जिल्ल कमिटीको आयोजनामा आज दरबारमार्गमा जागरण सभाको कार्यक्रम हुँदै छ । कार्यक्रमलाई एमाले अध्यक्ष तथा प्रधानमन्त्री केपी शर्मा ओली लगायतका नेताहरूले सम्बोधन गर्ने कार्यक्रम रहेको छ ।
सामाजिक अराजकता, नेकपा एमाले, सरकार र शासन व्यवस्था प्रति नै बढ्दो कुप्रचार तोड्दै सकारात्मक दृष्टिकोण विकासको लागि आजको सभा गर्न लागिएको नेकपा एमाले वाग्मती प्रदेश कमिटी अध्यक्ष कैलाशप्रसाद ढुङ्गेलले बताउनुभयो ।
आज बिहान ११ बजे भद्रकालीबाट सुरु हुने र्याली, सुनधारा, वीर हस्पिटल, जमल हुँदै दरबारमार्गमा पुगेर सभामा परिणत हुने कार्यक्रम रहेको छ । आजको कार्यक्रममा एक लाख बढीको सहभागिता हुने आयोजकले आकलन गरेको छ ।
