काठमाडौं । आज नवरात्रको सातौं दिन अर्थात् सप्तमी, पूजा कोठा वा दशैंघरमा शुभ साइतको प्रतीक फूलपाती भित्र्याएर मनाइँदृछ ।
हरेक वर्ष दुर्गा पक्ष अन्तर्गत आश्विन शुक्ल सप्तमीका दिन फूलपाती पर्व मनाइन्छ । फूलपातीकाे दिन हरेक घर‚ दशैंघर तथा शक्तिपीठमा फूलपाती भित्र्याउने र तिनका पत्रले देवीहरूलाई स्नान गराउने परम्परा छ । आश्विन शुक्ल सप्तमीकाे अवसरमा घरघरमा स्थापना गरिएको नवदुर्गा एवं दशैंघरमा आज फूलपाती भित्र्याइँदैछ ।
घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआराधना गरिएको दशैंघर अथवा पूजा कोठामा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष भित्र्याइन्छ । नवपत्रिकाको नामले समेत चिनिने फूलपाती नाैवटी देवीको प्रतीकका रुपमा फूलपाती भित्र्याएपछि नौदेवीको विधिपूर्वक पूजा आराधना गरिन्छ ।
नवरात्रकाे साताैं दिन आज कालरात्रि देवीको विधिपूर्वक पूजा आराधना पनि गरिँदैछ । नवरात्रका ९ दिन घटस्थापना गरिएको स्थलमा दुर्गा सप्तशती (चण्डी), श्रीमद्देवी भागवतलगायत देवी स्तोत्र पाठसमेत गरिन्छ । हरेक वर्ष आश्विन शुक्ल प्रतिपदादेखि नवमीसम्म दुर्गा देवीको विशेष आराधना गरिन्छ । ९ दिनसम्म पूजा आराधना गरेको प्रसाद विजयादशमीदेखि कोजाग्रत पूर्णिमाका दिनसम्म लगाइन्छ ।
नवरात्र अर्थात दशैंकाे पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्रि, आठौँ दिन महागौरी, र नवौँ दिन सिद्धिदात्रीको पूजा आराधना गर्ने गरिन्छ । दुर्गाका यी ९ वटा रुपलाई नवदुर्गा भनिन्छ ।
फूलपातीकाे अवसरमा काठमाडौंको हनुमानढोका दरबार, गोरखा दरबारलगायत ठाउँमा विशेष कार्यक्रमसाथ फूलपाती भित्र्याइन्छ । आजैकाे दिन हनुमानढोका दरबारको दशैंघरमा गोरखाबाट ल्याइएको फूलपाती भित्र्याउने परम्परा छ ।
फूलपातीका अवसरमा सैनिक मञ्च टुँडिखेलमा आज नेपाली सेनाले फूलपाती बढाइँ गर्दैछ । आज अपराह्न सैनिक मञ्च टुँडिखेलमा आयोजना हुने फूलपाती बढाइँ समारोहमा राष्ट्रपति रामचन्द्र पाैडेल सरिक हुनुहुनेछ । राष्ट्रपति भण्डारी नेपाली सेनाका परमाधिपति हुनुहुन्छ ।
दशैंको खास दिन आजैबाट सुरू हुन्छ । आजैबाट चहपहल बढ्छ । फूलपातीको दिनदेखि सरकारी कार्यालयहरुमा सार्वजनिक बिदा हुन्छ । दशैंको टीका थाप्न आ-आफ्नो घर फर्किने क्रम पनि फूलपातीकाे दिनबाट तीब्र रूपमा बढ्छ ।
गाउँघरमा आजैका दिनदेखि दोबाटो, चौतारो र चौबाटामा हालिने लिंगेपिङ र रोटेपिङले दशैंको रौनकलाई अझ बढाउँछ । याे रमाइलाेले मनै लाेभ्याउँछ । काठमाडाैं उपत्यका छाड्नेकाे संख्या पनि बढेकाे छ ।
