मुगु । मुगुम कार्मारोङ्ग गाउँपालिका प्रमुख छिरिङ्ग क्याप्ने लामा र चिनियाँ सीमा नाका प्रमुख शुचि चिनबीच भेटवार्ता भएको छ ।
मंगलबार चीनको ह्यजिमारमा चलिरहेको हाटबजारमा सो भेटवार्ता भएको गाँउपालिकाका सूचना तथा प्रविधी अधिकृत सोबेन्द्र बहादुर मल्लले जानकारी दिनुभयाे ।
मल्लका अनुसार भेटवार्तामा पालिका प्रमुखले नाग्चेलाग्ना नाका चीन र नेपालको परम्परागत नाका भएकोले दुबै देशले सीमासम्म सडक विकास गर्नुपर्ने बताउनुभएकाे छ ।
यस्तै, उहाँले भेटवार्तामा दुवै देशका जनतालाई सहज वातावरण सिर्जना गर्नको लागि स्थायी रुपमै नाका खोल्न नेपाल सरकारसँग पहल गर्ने भन्दै चिनियाँ सीमा नाका प्रमुखलाई पनि पहल गर्न प्रस्ताव गरेका थिए ।
सीमा नाका हेर्ने स्थानीय चिनियाँ अधिकारी सुचिले पालिका प्रमुखको प्रस्तावलाई स्वीकार गर्दै नेपालसँगको नाका स्थायी रुपमै खोल्न र सडकलगायत अन्य पूर्वाधार बनाउन पहल गर्ने प्रतिबद्धता गरेको पनि मल्लले जानकारी गराए ।
