काठमाडौं । नेकपा एमालेका प्रमुख सचेतक महेश बर्ताैलाले पर्सा वन्यजन्तु आरक्षका कर्मचारीबाट हत्या गरिएकाका मकवानपुरका शुकबहादुर तितुङको परिवारलाई राहत दिन माग गरेका छन् ।
आइतबार प्रतिनिधिसभाको आकस्मिक समयमा बोलेका बर्तौलाले मकवानपुरको हेटौंडा उपमहानगरपालिका–१४ का शुकबहादुर तितुङको पर्सा वन्यजन्तु आरक्षका वार्डेनको निर्देशनमा हत्या गरेको दाबी गर्नुभयो ।
‘पर्सा वन्यजन्तु आरक्षका सुरक्षाकर्मीहरुले शुकबहादुर तितुङ लगायतका जनताहरुलाई आक्रमण गरे गोली हानेर शुकबहादुर तितुङको हत्या गरे ।’
उहाँले यही असार ७ गते मध्यवर्ती क्षेत्र वनभित्र त्यहाँका सुरक्षाकर्मीले सामान्य मानवियता समेत नराखी तितुङको हत्या गरेको बताउनुभयो ।
बर्तौलाले वन जंगल संरक्षण गर्ने जनतालाई नै गोली हानी मारेको भन्दै उक्त हत्याका दोषीलाई कारबाही गरिनुपर्ने र उचित क्षतिपूर्तिको व्यवस्था गर्न सरकारको ध्यानाकर्षण गराउनुभयो ।
‘घटना भैसक्यो दोषी सुरक्षाकर्मीलाई पहिचान गरी कारबाहीको तहमा अघि बढाउने र पीडित परिवारलाई आवश्यक क्षतिपूर्ति दिन सरकारको ध्यानाकर्षण गराउन चाहन्छु,’ उहाँले भन्नुभयो ।
