काठमाडाैं । नेपाली कांग्रेसले आज काठमाडाैंमा प्रदर्शन गर्दैछ ।
सहकारी ठगी काण्डविरुद्ध कांग्रेसले आज काठमाडाैंमा प्रदर्शन गर्न लागेकाे हाे । कांग्रेसकाे बुधबार बसेको केन्द्रीय कार्यसमितिको बैठकले काठमाडौं उपत्यकाका ३ जिल्लाका १५ निर्वाचन क्षेत्रबाट प्रदर्शन गर्ने निर्णय गरेको थियो ।
सहकारी बचतकर्ताको रकम फिर्ता गर्नुपर्ने, उपप्रधान तथा गृहमन्त्री रवि लामिछानेमाथि संसदीय छानबिन हुनुपर्ने लगायत माग राखेर कांग्रेसले उपत्यकाकेन्द्रित सडक आन्दोलन गर्न लागेको हो । उपत्यकापछि क्रमशः प्रदेश र जिल्लामा पनि आन्दोलन गर्ने कांग्रेसले जनाएकाे छ ।
सहकारी ठगी काण्डमा गृहमन्त्रीमाथि छानबिनका लागि संसदीय छानबिन समिति बनाउनुपर्ने अडानसहित अघिल्लाे अधिवेशनकाे अन्तिमतिर र चालु अधिवेशनकाे सुरु देखिनै कांग्रेस सदन अवरुद्ध गर्दै आएकाे छ ।
