एमाले अध्यक्ष ओली झापा जाँदै,'बासँग बालबालिका' कार्यक्रममा सहभागी हुने

काठमाडाैं । नेकपा एमालेका अध्यक्ष एवं पूर्व प्रधानमन्त्री केपी शर्मा ओली आज झापा जानुहुने भएकाे छ ।

गृह जिल्लामा हुने विभिन्न कार्यक्रममा सहभागी हुन अध्यक्ष ओली झापा जान लाग्नुभएकाे उहाँकाे सचिवालयले जनाएकाे छ । झापा पुग्नासाथ आजै उहाँ 'बासँग बालबालिका' कार्यक्रममा सहभागी हुनुहुनेछ ।

झापा जिल्ला बाल सञ्चालले पूर्वमै पहिलो पटक आयोजना गर्न लागेकाे 'बासँग बालबालिका' कार्यक्रम सुरुंगास्थित कनकाई उद्योग वाणिज्य संघको सभाहलमा सञ्चालन हुनेछ ।

झापा जिल्ला बाल सञ्जालका अध्यक्ष अभिषेक मिश्रका अनुसार कार्यक्रममा जिल्लाभरका पालिकाहरुबाट ३०-३० जना बालिका र कनकाईबाट समेत गरी ६ सय बालबालिका सहभागी हुनेछन् । बालबालिकाले बासँग बालबालिका सम्बन्धी दूरदृष्टि-भिजन सुन्ने छन् ।

साे कार्यक्रमपछि अध्यक्षले जिल्लाका नेता-कार्यकर्तासँग भेटघाट गर्नुहुनेछ ।