काठमाडौं । अफगानिस्तान र पाकिस्तानमा भारी वर्षा र चट्याङका कारण ५७ जनाको ज्यान गएको छ । योसँगै दुवै देशमा एक हजारभन्दा बढी घरमा क्षति पुगेको छ भने २५० भन्दा बढी पशुपंक्षीको ज्यान गएको बताउनुभएको छ ।
ज्यान गुमाउनेमा अफगानिस्तानका ३३ र पाकिस्तानका २४ जना रहेका छन् । पाकिस्तानमा सबैभन्दा धेरै निधन पञ्जाब प्रान्तमा भएको छ । दुवै देशका मौसम पूर्वानुमान महाशाखाका अनुसार आगामी दिनमा भारी वर्षाको सम्भावना रहेको छ ।
तालिवानको प्राकृतिक प्रकोप व्यवस्थापन मन्त्रालयका प्रवक्ता अब्दुल्लाह जनान साकले बाढीले राजधानी काबुल र देशका अन्य धेरै प्रान्तहरू प्रभावित भएको बताउनुभयो । बाढीबाट झण्डै ८ सय हेक्टर बाली नष्ट भएको छ भने सडकमा क्षति पुगेको छ ।
सबैभन्दा बढी क्षति पश्चिमी फराह, हेरात, दक्षिणी जाबुल र कान्दाहार प्रान्तमा भएको छ । मौसम विभागले अफगानिस्तानका ३४ प्रान्तका अधिकांश क्षेत्रमा आगामी दिनमा भारी वर्ष हुने चेतावनी दिएको छ ।
