काठमाडाैं । काठमाडौंमा आजदेखि काेभिड विरुद्धकाे भेराेसेल खाेपकाे दाेस्राे डाेज लगाईंदैछ ।
भेराेसेलकाे पहिलो डाेज लगाएका नागरिकलाई दोस्रो डाेज दिन लागिएको जिल्ला स्वास्थ्य कार्यालय काठमाडाैंले जनाएकाे छ । यसअघि भेराेसेलकाे पहिलाे डाेज लगाएका ५० वर्ष वा सो भन्दा माथि उमेरका समूहका सबैलाई दोस्रो डाेज दिइनेछ । विश्वविद्यालय र विद्यालयका प्राध्यापक, शिक्षक र कर्मचारी, सार्वजनिक यातायातका चालक र सहचालकलाई पनि दाेस्राे डाेज दिइनेछ ।
अत्यावश्यक सेवामा कार्यरत व्यक्ति, खोप अनिवार्य गरिएका देशमा जाने नेपाली नागरिक र यस अघि भेरोसेलको दोस्रो डाेज लगाउन छुटेका नागरिकलाई पनि दोस्रो डाेज दिइने कार्यालयले जनाएकाे छ ।
काठमाडौंका सबै वडा र स्थानीय तहका १ सय ४६ खोप केन्द्रमा गएर खाेप लगाउन सकिनेछ । राधास्वामी आइसोलेशन सेन्टर, सशस्त्र प्रहरी बल अस्पताल, वीर अस्पताल, त्रिवि शिक्षण अस्पताल, सिभिल अस्पताल, परोपकार प्रसूति गृह तथा स्त्रीरोग अस्पताल, वीरेन्द्र सैनिक अस्पताल र नेपाल प्रहरी अस्पतालमा गएर पनि दाेस्राे डाेज लगाउन सकिने कार्यालयले जनाएकाे छ ।
पहिलो डाेज खोप लगाएको खोपकार्ड र विद्युतीय दर्ता गरेको प्रिन्ट वा फोटोसहितको नम्बर लगेर खाेप लगाउन जान कार्यालयले अनुराेध गरेकाे छ । दाेस्राे डाेजकाे भेराेसेल खाेप भदाै १३ गतेसम्म लगाइनेछ ।
